Dutis lis gnovis

Formazion linguistiche pai dipendents des aministrazions publichis, ai 7 di Novembar al tache l'ultin cors di lenghe furlane dal 2022

A tornin a tacâ i cors gratuits di lenghe furlane pai dipendents des aministrazions publichis, inmaneâts de bande dal Centri interdipartimentâl pal disvilup de lenghe e de culture dal Friûl (CIRF) de Universitât dal Friûl.

Ai 7 di Novembar si invie l’ultin dai cors previodûts pal 2022, che al larà dilunc fintremai ai 14 di Dicembar
La ativitât di formazion linguistiche e je dividude in dîs  incuintris (il lunis cun orari 14.30-17.30 e il miercus di 9 e mieze a buinore a misdì e mieç, par un totâl di 30 oris di lezion) e si fasarà  in linie su la plateforme informatiche Microsoft Teams

La tipologjie specifiche dal cors che al vignarà ativât - percors di nivel di base (nozions di fonde de grafie uficiâl e de gramatiche de lenghe furlane) o di nivel intermedi (par rinfuarçâ il lessic e par aprofondî lis regulis di grafie e di gramatiche) - e vignarà definide daûr di chê che e je la domande formative che e salatarà fûr des domandis di partecipazion che a rivaran.

Ai corsiscj che a passaran l’esam finâl e che a varan frecuentât almancul l’80% des oris ur vignarà dât un atestât di frecuence

Cheste ativitât formative e ven metude adun daûr de leç 482 dal 1999, par che i dipendents des aministrazions publichis a puedin cjapâ sù lis competencis linguistichis che a coventin par fâ il ben lôr mistîr di “civil servants” in linie cun ce che a previodin l'articul 6 de Costituzion de Republiche Taliane e lis leçs di tutele, a nivel statâl e regjonâl.

Par vê altris informazions e par notâsi al covente contatâ la segretarie organizative dal CIRF al numar di telefon 0432 556480 o midiant de pueste eletroniche scrivint aes direzions cirf(at)uniud.it (segretarie dal CIRF) o sportel.furlan(at)uniud.it (Sportel pe Lenghe Furlane). 

Il modul di iscrizion si pues copiâlu achì in bande o domandâlu par pueste eletroniche (cirf(at)uniud.it o sportel.furlan(at)uniud.it).

Indaûr