FaSÌN. net – Famiglie Sicure INsieme nella rete al è daûr a finî. Il progjet metût adun de bande de APS KLARIS cun chê di disvilupâ percors formatîfs sui temis de citadinance digjitâl a pro di un ûs dal web sigûr e cussient si siere vie par cheste setemane. Martars ai 31 di Mai a Voleson (inte sale Roma di place dal Marcjât 2) a 9 mancul un cuart di sere e je in progran la ultime conference publiche dal titul Libertà di navigazione? intant che miercus il 1n di Jugn a Felet (inte sale dal Consei comunâl dal Comun di Tavagnà) a 6 sore sere si fasarà la taule taronde finâl dal progjet. In chê ocasion Andrea Paschetto dede Universitât dal Friûl al presentarà in struc i risultâts di un studi sul impat de didatiche a distance sui adolessents, fate suntun campion di passe 1300 fantatis e fantats des scuelis secondariis di secont grât de provincie di Udin. 

Il progjet FaSÌN. net – Famiglie Sicure INsieme nella rete al met dongje la taule taronde finâl, une serie di laboratoris cui fruts, un cicli di conferencis par ducj e sîs trasmissions par radio, fatis e passadis su Onde Furlane e ancjemò a disposizion in podcast.

La iniziative e je stade metude adun cul finanziament de Regjon autonome Friûl-Vignesie Julie midiant des risorsis statâls dal Ministeri dal lavôr e des politichis sociâls, cul patrocini de Universitât dal Friûl e dai Comuns di Bicinins, di Cjarlins, di Caprive, di Martignà, di Pagnà, di Premariâs, di Tavagnà e di Voleson e Darzin cu la colaborazion de cooperative Informazione Friulana e de associazion MEC – Media Educazione Comunità.
 
Par savênt di plui: klarisweb.wordpress.com e https://www.facebook.com/AssociazioneKlaris.