Inte suaze dal Festival Vicino/Lontano il CIRF al invide ae prime di Lingua Mater, il gnûf documentari di Massimo Garlatti-Costa, vinars ai 9 di Mai aes 17.30 te glesie di S. Francesc a Udin.

La pelicule, che e à la poie dal CIRF e dal DILL, e je un viaç che al travierse oceans e continents par contâ il leam profont tra lis personis e lis lôr marilenghis. Des monts furlanis ae Afriche des lenghis autoctonis, de Catalogne aes comunitâts ocitanis tra Italie, France e Spagne, fin ae diaspore furlane in Argjentine, Lingua Mater al esplore storiis di apartignince, memorie e resistence culturâl.

Cun testemoneancis e imagjins racueltis in diviersis comunitâts, il documentari al pant la ricjece e la fragjilitât di patrimonis linguistics unics, invidant a rifleti su la impuartance di preservâ e tramandâ chestis vôs, che vuê plui di simpri a son menaçadis de globalizazion.