Slargjâ la ufierte formative pai students, vierzint di plui la proprie puarte di cjase. Cheste la propueste dal Centri Interdipartimentâl pal svilup de lenghe e de culture dal Friûl (CIRF), che al inmanee une gnove session estive dai cors gratuits di lenghe e culture furlane pai students de Universitât dal Friûl e par ducj i zovins interessâts, di mût di fâur cognossi miôr la ricjece de nestre tiere, sedi a nivel linguistic, sedi par chel che al inten la storie, lis tradizions e il teritori. Ogni percors al sarà dividût in 7 lezions, par un totâl di 20 oris. I prins 6 incuintris a saran di 3 oris, intant che la ultime lezion, chê dal esam finâl, e sarà di 2 oris. Jenfri i argoments tocjâts, in plui dai elements di fonde de grafie e de gramatiche e di cualchi nozion di storie e culture, a vignaran presentâts i struments informatics di podê doprâ par judâsi tal scrivi tescj par furlan e si fevelarà ancje di manifestazions e progjets indreçâts ai zovins. Un dai doi cors al tacarà ai 9 di Lui e al larà indenant ducj i lunis e i miercus fin ai 30 dal mês, di 3 e mieze a 6 e mieze daspò misdì, li de sale Florio di Palaç Florio (vie Palladio 8). Chel altri, invezit, si fasarà ai Riçs, te aule 2, dai 29 di Avost ai 19 di Setembar, simpri di 3 e mieze a 6 e mieze daspò misdì. La ativitât e je metude in pîts cul patrocini de Agjenzie Regjonâl pe Lenghe Furlane (ARLeF) e de Societât Filologjiche Furlane e cun Cooperative Informazion Furlane/Radio Onde Furlane tant che media partner. Dongje des lezions frontâls, a son in program ancje visitis vuidadis a realtâts locâls, tant che lis sedis de ARLeF e de Filologjiche e i studis di Radio Onde Furlane. A ducj i iscrits ur vignarà dât un atestât di partecipazion. Pai fantats des superiôrs e je la pussibilitât di vê il ricognossiment dai credits formatîfs pe ativitât extrascolastiche.

Par informazions e pes iscrizions si pues clamâ il CIRF al numar 0432 556480 o pûr mandâ un messaç di pueste eletroniche a sportel.furlan@uniud.it o cirf@uniud.it