Dutis lis gnovis

Il CIRF al inmanee doi cors di lenghe furlane pai dipendents des aministrazions publichis

cors an 2021

La Universitât e va dilunc cu la formazion, a pro dai dirits linguistics di funzionaris e citadins

Ancje pal 2021 il Centri interdipartimentâl pal svilup de lenghe e de culture dal Friûl (CIRF) de Universitât dal Friûl al torne a proponi i siei cors gratuits di lenghe furlane indreçâts ai dipendents de Aministrazion Publiche e inmaneâts in gracie dai fonts de leç 482 dai 15 di Dicembar dal 1999, pe tutele des “minorancis linguistichis storichis”.

Pe session de Vierte a son in program doi cors, un di nivel di fonde, dai 22 di Març ai 26 di Avrîl, e un di nivel intermedi, dai 3 di Mai ai 3 di Jugn.

Ducj i doi i cors a son dividûts in 10 incuintris, che si davuelzaran su la plateforme informatiche “Microsoft Teams”, tai dopomisdîs di lunis e di miercus (fale che l’ultin apontament dal cors di nivel intermedi, che si fasarà di joibe), des 2 e mieze aes 5 e mieze.

Ae fin dal percors formatîf al è previodût un esam, di mût di stazâ lis competencis cjapadis sù. Ai corsiscj che a passaran la prove finâl e che a varan frecuentât almancul l’80% des oris ur vignarà dât un atestât di frecuence.

Intai agns, la iniziative si è dimostrade un strument zovevul par chei che a lavorin intun Ent Public tal teritori furlanofon e che a àn voie di insiorâ lis lôr competencis e di miorâ tal stes timp ancje il contat cui utents. Cun di plui, si metin in vore ancje lis indicazions de Leç 482/1999 e de L. R. 29/2007, che a previodin che si dopri la lenghe furlane intai Ents Publics e intes societâts di servizis ae popolazion.

Par vê altris informazions e par notâsi si pues contatâ la segretarie organizative dal CIRF al numar 0432 556480 o pûr mandâ un messaç di pueste eletroniche a cirf@uniud.it (segretarie dal CIRF) o ben a sportel.furlan@uniud.it. Si pues discjamâ il modul di iscrizion dal sît http://cirf.uniud.it.

 

Discjame la locandine, il calendari des lezions e il modul di adesion.

Indaûr