“Contis des valadis: tradizions, inovazion, sostignibilitât”. Al è il titul dal incuintri che la Universitât dal Friûl e fasarà miercus ai 26 di Jugn, aes 18, tal Museu Naturalistic e See Veneziane, in localitât Aplis (2/c) a Davâr, in colaborazion cul Comun. L’apontament al fâs part des ativitâts dal master “Inovazion dai sistemis agrosilvopastorâi de mont. Impresis e teritoris” ativât dal Ateneu furlan.

A saran intervents di Giuseppe Ragogna, gjornalist, za vicediretôr dal “Messaggero Veneto”, e autôr di “Friuli, storie di rinascita della montagna”; Orietta Gressani, de Bioapiculture Pura (Lauc); Giovanni Donada, dal Mulin Baus (Davâr); Elisa Cimolai, dal Agriturisim Km 0 (Lauc).

«L’event – e sclarìs la diretore dal master, Ivana Bassi – al forme part de setemane residenziâl organizade tal complès turistic e ambientâl di Aplis di Davâr in colaborazion cu la cooperative Cramârs di Tumieç. Il complès al nas de idee di recuperâ i edificis peâts ae vecje see. Il proprietari di dut il complès al è il Consorzi dai boscs de Cjargne, che al è ancje un dai partner dal master. Tal program dal master a son lezions, visitis di studi a un pocjis di aziendis cjargnelis, escursions e laboratoris».

I partner dal master

Cheste iniziative formative e à il supuart des sîs comunitâts di mont de regjon: Dolomitis furlanis, Cjaval e Cansei; Prealps furlanis orientâls; Cjargne; Cjanâl dal Fier e Val Cjanâl; Glemonàs; Nadison e Tor. E cun di plui dal Consorzi dai comuns dal bacin imbrifar di mont (Bim) dal Tiliment, Carnia Industrial Park, PrimaCassa Credit Cooperatîf F-VJ, Confcooperativis e Legacoop dal Friûl‑Vignesie Julie. E je une rêt di colaboradôrs une vore largje cui Gal Montagne Leader, Euroleader, Open Leader e Tor Nadison, i doi parcs regjonâi des Dolomitis Furlanis e des Prealps Juliis, il Consorzi dai boscs de Cjargne e Legno servizi, il Segretariât permanent de Convenzion des Alps e Cipra, la Fondazion Cumeli Dolomitis, il Club Arc Alpin e il Cai, sede centrâl e delegazion dal Friûl‑Vignesie Julie.