Si svicine la scjadince par partecipâ a doi dai plui impuartants concors leteraris in lenghe furlane: il concors Vôs de Basse e il premi Nelso Tracanelli.

Cu la ocasion us segnalìn ancje altris concors che a scjadin plui indevant, cussì o podês salvâ la pagjine tai sîts preferîts e vê dutis lis informazions sot man intun sôl puest.

• Vôs de Basse (narative [contis e teatri], poesie, traduzion, students - dut in lenghe furlane): fin ai 31 di Avost
• Premi Nelso Tracanelli (poesiis par furlan e par talian): fin ai 31 di Avost
• Salva la tua lingua locale (poesie e prose edite e inedite, teatri inedit, fumut edit - in dialet o tes lenghis locâls): fin ai 18 di Setembar
• Premi Dolfo Zorzut (narative, poesie, students - lenghis: talian, furlan, sloven, todesc, bisiac, graisan): fin ai 31 di Otubar
• Premi Richinvelda (contis par furlan e par talian): fin ai 30 di Novembar

Par stiçâus a partecipâ us scrivìn ancje 5 buinis resons par partecipâ ai concors leteraris.

1. Par motivâti a fâ esercizi di scriture in lenghe furlane.
2. Par ricevi une opinion competente e obietive su la tô scriture.
3. Par cognossi altris autôrs e par confrontâti cun lôr.
4. Par fâti cognossi di un public atent e interessât ae leterature in lenghe furlane.
5. Par viodi il to lavôr publicât (se il concors lu previôt) o par jentrâ in contat cui editôrs.