Dutis lis gnovis
Concors leteraris in lenghe furlane
Concors Vôs de Basse, Premi di Poesie Renato Appi, Concors par tescj teatrâi, Concors Glemone îr vuêi e doman
Us inzornin sui concors vierts pai autôrs di contis, poesiis, fumets e tescj teatrâi in lenghe furlane.
Glemone îr vuêi e doman
Il comun di Glemone al bandìs la XVII edizion dal concors intitulât in memorie di pre Pieri Londar, par assegnâ il premi leterari in lenghe furlane “Glemone îr, vuei e doman”.
Il concors al è dividût in trê sezions che a son specificadis tal art. 2 dal bant.
I scrits a àn di rivâ o a mieç pueste racomandade A.R. o cun consegne a man tal orari di vierzidure al public, al Ufici dal Protocol dal Comun di Glemone, "Concors Glemone îr, vuei e doman", dentri dai 30 di Avost dal 2024.
Sul sît dal comun di Glemone si pues discjamâ il bant dal concors cun dutis lis informazions.
Concors par tescj teatrâi
La Associazion Teatrâl Furlane e à bandît un concors par selezionâ gnûfs tescj teatrâi in lenghe furlane, che a sedin monolics, curts teatrâi o oparis teatrâls completis dal gjenar de comedie.
Il concors si davuelç in plui fasis:
- Iscrizion al concors (dentri dai 30 di Avost)
- Partecipazion (conseade) a un cors di scriture e consulence dramaturgjiche (tai mês di Setembar/Otubar)
- Spedizion dai tescj par furlan ae fin dal cors (dai 30 di Otubar ai 30 di Novembar)
- Selezion di bande de jurie dai tescj finaliscj
- Analisi e eventuâl revision (facoltative) dai tescj finaliscj
- Votazion dai tescj finaliscj di bande des compagniis sociis de A.T.F.
- Serade finâl
Sul sît de Associazion Teatrâl Furlane si pues discjamâ il bant cul regolament dal concors.
Vôs de Basse
E je vierte la setime edizion dal concors leterari in lenghe furlane “Vôs de Basse”, inmaneât dai Comuns di Cjarlins, Gonârs, Muçane, Porpêt, Prissinins e San Zorç di Noiâr, midiant dal Sportel associât pe lenghe furlane.
Il bant al previôt cuatri diviersis sezions: narative (contis curtis e tescj teatrâi), poesie, traduzion e students. La ultime sezion e je indreçade ae scuelis primariis e e je inmaneade in colaborazion cun Docuscuele – Centri Regjonâl di documentazion, ricercje e sperimentazion didatiche pe scuele furlane.
Il bant al scjât a misdì e mieç di lunis ai 2 di Setembar dal 2024.
Dutis lis informazions a son sul sît de Filologjiche.
Premi di poesie "Renato Appi"
La XIII edizion dal Premi internazionâl di poesie "Renato Appi" e je une iniziative dal Comun di Cordenons e dal Grop dal Ciavedal, cu la partecipazion de Famee Appi.
Il Premi, viert a ducj, al è risiervât ae poesie in lenghe furlane in dutis lis sôs variantis. Il teme al è libar, cuntun numar di componiments variabil di un a cinc, par un massim di cincuante viers ognidun.
Lis scuelis a puedin partecipâ cun lavôrs di ricercje peâts ae culture popolâr e aes tradizions dal teritori, doprant dutis lis espressions artistichis che a àn caraterizât la produzion di Renato Appi (conte, poesie, teatri, cine, fotografie, musiche).
Lis voris a àn di rivâ dentri dai 31 di Març dal 2025.
Dutis lis informazions a son sul sît dedicât al premi.
