Chê di vuê e je une zornade impuartante par cui che i ten al pluralisim linguistic e culturâl. Cun di fat, a tacâ dal 2000, chê dai 21 di Fevrâr e je la Zornade internazionâl de lenghe mari.

La ricorence, proclamade de bande de Conference Gjenerâl de UNESCO ae fin dal 1999, e à chê di promovi il valôr de diversitât linguistiche e il dirit di doprâ la lenghe proprie.

La rilevance de dimension dai dirits linguistics in cheste iniziative e salte fûr a clâr inte date sielzude de UNESCO, stant che ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl.
Tra lis altris, in chê dì diviers manifestants a forin copâts de bande des fuarcis di polizie dal Pakistan, che in chê volte al cjapave dentri ancje il Bangladesh, deventât indipendent dome tal 1971.

Memoreâ la Zornade internazionâl de lenghe mari al vûl dî vê cussience che lis lenghis e i dirits linguistics a son alc di impuartant simpri, ducj i dîs e par ducj.

Ve chi il video che al è stât prontât cul coordenament dal NPLD, la rêt europeane pe promozion de diversitât linguistiche che di chê a fasin part ancje la Universitât dal Friûl, midiant dal CIRF, e la ARLeF.