Dai 4 ai 6 di Otubar al torne Collega-menti, il festival culturâl de Universitât dal Friûl cu la direzion artistiche di Barbara Gallavotti

Lis “inteligjencis” a saran il focus principâl de seconde edizion di Collega-menti, il festival culturâl organizât de Universitât dal Friûl e promovût dal retôr Roberto Pinton, che al torne chest an dai 4 ai 6 di Otubar cu la direzion artistiche di Barbara Gallavotti.

Intes trê zornadis, cu la partecipazion di tancj ospits come il comandant dal Repart des Indagjins Sientifichis (Ris) dai Carabinîrs di Parma, il gjenerâl Giampietro Lago, il gjornalist Marco Carrara, il fisic e divulgadôr Vincenzo Schettini e docents e ricercjadôrs dal Ateneu Furlan, a saran investigâts i diviers “gjenars” di inteligjence: chê umane, chê animâl, la gnove version artificiâl, ma ancje chê des plantis e dai microbis.

Cun di plui, o fevelarìn di cemût sfrutâ i vantaçs de inteligjence artificiâl par supuartâ la inteligjence umane: dal cambiament climatic ae produzion di mangjative, de mobilitât al disvelament di codiçs che a somein inviolabii, ae esplorazion dal spazi e ancjemò tant di plui. La nestre inteligjence no je aplicade dome aes cuistions sientifichis, ma ancje a chês umanistichis, storichis e leterariis, che si instrecin intune trame une vore strete che e sarà evidenziade vie pal event.

Une oportunitât vierte a ducj par scuvierzi lis ativitâts di ricercje de Universitât dal Friûl in ducj i lôr aspiets, ancje midiant di tancj laboratoris e instalazions. A partî de grande “mostre laboratori” che si pues viodi inte ex glesie di Sant Francesc che e permetarà di jentrâ inte decifrazion di un papîr antîc, intal ûs di un scanner laser par rilevâ il spazi ator, di otimizâ il percors dai drons vuidâts in mût autonom, di viodi il prototip di une machine di corse eletriche a un puest. E ancjemò, si podarà partecipâ a laboratoris par dutis lis etâts, di chei dedicâts a argoments specifics a lis instalazions che a permetaran di rivâ al cûr dal Big Bang, e ancje di sintî i suns di un glaçâr che al è daûr a disfâsi.

Il Festival Collega-Menti al è organizât de Universitât dal Friûl e promovût dal retôr Roberto Pinton, cu la poie di Promoturismo FVG e dal Comun di Udin.