Dutis lis gnovis

Suns Europe, inte sezion cinematografiche a son ancje dôs oparis che a rivin de Ocitanie e dal Paîs Basc

Lis proiezions di “Bogre” e di “Ane” si fasaran a Udin li dal Visionario ai 28 e ai 29 di Lui

Dopo de proiezion di Pozzis, Samarcanda, che e à screât dut il festival ai 20 di Lui stât, la sezion cinematografiche di Suns Europe e va dilunc cun altris doi cines di cualitât che a sclarissin une vicende storiche une vore pôc contade e a frontin la complessitât dai rapuarts tra gjenitôrs e fîs.

Il prin, dal titul Bogre, al è un cine documentari dal regjist ocitan Fredo Valla che nus conte de “grande eresie europeane”, chê dai Catars e dai Bogomii, e nus compagne intun viaç par mieze Europe – de Bulgarie ae Ocitanie – ae ricercje des relazions culturâls e religjosis jenfri chescj doi moviments. Une opare che e cjale al passât ma che e propon une riflession, magari cussì no inmò atuâl, su lis persecuzions cuintri dal “diviers”.

Ane, la seconde opare in program, al è invezit un cine dramatic in lenghe basche dal regjist David Pérez Sañudo. E je la storie di une mari che tornade a cjase di vore e scuvierç che so fie Ane e je sparide. Si met alore a cirîle e li sôs vicendis a deventin une oportunitât par frontâ la complessitât dai rapuarts tra gjenitôrs e fîs e, tal stes timp, lis tensions che a segnin la societât basche contemporanie. La proiezion di Udin e je la prime in assolût a nivel talian.

La jentrade ai doi spetacui e je a paiament: si pues comprâ i biliets di Bogre, in program ai 28 di Lui aes 8 sot sere, e di Ane, in program ai 29 di Lui aes 8 e mieze sot sere,  in rêt li di cheste direzion.
Ducj e doi i cines a vignaran proietâts li dal Cinema Visionario di Udin.

Indaûr