Ai 28 di Otubar, fieste di Sant Simon apuestul, si è davuelte a Codroip come par tradizion la cerimonie di premiazion dal Premi leterari San Simon, rivât ae edizion numar 45.

I vincidôrs a son Laurin Zuan Nardin inte sezion narative cu la opare Tre dîs e Mattia Modde inte sezion de conte a fumets cun Vuerîr di Splaze. Vie pe serade a son stâts i intervents musicâi di Nicole Coceancig e Leo Virgili, che a àn sunât trê cjançons gjavadis dal album Zohra che al sarà dât fûr in Dicembar.

Il Premi San Simon, il principâl premi leterari in lenghe furlane, al è dât fûr ogni an dal Comun di Codroip in colaborazion cu la Societât Filologjiche Furlane, la Agjenzie Regjonâl pe Lenghe Furlane (ARLeF), l'Istitût Ladin Furlan Pre Checo Placerean. il PAFF di Pordenon, il Liceu Artistic Statâl Enrico Galvani di Cordenons e l'Ent Friûl tal Mont in memorie dal inzegnîr, furlanist e scritôr Angelo Pittana (Agnul di Spere).

I lavôrs vincidôrs a son publicâts de Societât Filologjiche Furlane. Il libri a fumets, in plui de opare premiade, al à dentri ancje chês altris oparis che a àn partecipât: Mattotti in Vile di Matteo Batetta, Perin di Puartis di Gio Di Qual e Gio De Luca e Inlà da la metât di Martino Bonaldo, Elisa Meri Pilot e Rebecca Del Zuanne.