Suns Europe al fâs dîs agns, tancj events dai 11 ai 19 di Otubar

Dîs agns. Il 2024 al è un travuart impuartant pal festival des arts tes lenghis minorizadis, Suns Europe. Dîs agns di musiche, leterature, teatri, cine, intes lenghis di minorance dal continent european. Un complean che Suns si prepare a festezâ cuntune gnove imagjin grafiche e un program che al cjale indaûr aes sôs origjins. Il festival, organizât ogni an de cooperative Informazione Friulana, editore di Radio Onde Furlane - cul supuart finanziari de Regjon Autonome Friûl - Vignesie Julie, de ARLeF - Agjenzie Regjonâl pe lenghe furlane, dal Comun di Udin e de Fondazione Friuli e la colaborazion di une vore di altris ents publics e privâts - al à comunicât il program di chest an.

IL CONCIERTON

Il conciert, ancje chest an ospitât dal Teatri Gnûf Giovanni da Udine, sabide ai 19 di Otubar aes 9 di sere, al sarà, come ogni an, il moment plui impuartant de programazion. Ogni artist (o grup) al puartarà dome une cjançon, tornant cussì a vê une sole pussibilitât par cjapâ il vôt dal public in sale! Pe prime volte e sarà sul palc dal Teatron la comunitât arumene rapresentade dai Tumbe, la ponte di diamant di un disvilup culturâl impuartant che al sta cressint ator di cheste lenghe difondude in ducj i Balcans. Il Gales al tornarà invezit cui Ynys che a cumbinin armoniis malinconichis e efiets vintage dai agns ‘70-’80 cuntune rare sensibilitât. No pues mancjâ la rapresentance iberiche cun Mice (Paîs Basc) cu la sô musiche plene di atmosferis scuris sostignudis di ghitaris fuartis e cui catalans “Remei De Ca La Fresca”, un dai grups plui dificii di classificâ dentri dal grup musicâl Indian Runners. E je presinte ancje une rapresentance des Fær Øer cun Silvurdrongur che al incrose i paisaçs scurts e aliens des isulis, intun colâç eletroacustic di gjenars e temis. Giganto invezit al è il re incontestât dal hip hop dai Grisons. Invezit Marianne Veenstra, vincidore dal Drèents Liedtiesfestival, e ven de Basse Sassonie cu la cjançon 't Is zo wisse, la storie autobiografiche di une relazion che e je finide. A Suns Europe 2024 al sarà ancje Gushi (Slavie friulane), un progjet che al è nassût inte imense metropoli di Buenos Aires e al è sflorît tal piçul paîs di Postregne, tes Valadis dal Nadison; e Nicole Coceancig che e incjarne la dissendence dal cjantâ popolâr feminin, forsit la espression plui tipiche e pure de musiche furlane. La serade - in direte su Radio Onde Furlane des 21 aes 23, condusude di Mauro Missana - e sarà presentade di Michele Polo e Federica Angeli. I biliets si puedin comprâ sul sît www.vivaticket.it, tes rivenditis autorizadis di Vivaticket e inte bilietarie dal Teatri Gnûf Giovanni da Udine (di martars a sabide des 16 aes 19, a partî dai 10 di Otubar).

DUCJ I EVENTS E CONCIERTS

• Vinars ai 11 di Otubar, aes 17.00, incuintri“Plui lenghis, plui culture, plui Europe”, a Gurize.
• Vinars ai 11 di Otubar aes 21.00, te Cantine Gradnik di Cormons, conciert di Pokriva Nociva (comunitât slovene dal Friûl) cun Don Condor eta Ñora Alacran (Paîs Basc).
• Sabide ai 12 di Otubar, aes 21.00, al Cral Arci Ciliti di San Vît dal Tiliment, a saran sul palc i furlans Bakan e i bascs Niña Coyote eta Chico Tornado.
• Joibe ai 17 di Otubar, aes 21.00, conciert al Ottagono di Codroip di Mice (Paîs basc), Silvurdrongur (Isulis Fær Øer) e Tumbe (comunitât arumene).
• Vinars ai 18 di Otubar aes 17.30, apontament te Librerie Tarantola a Udin cul scritôr e cartograf breton Mikael Bodlore-Penlaez, autôr, tra l'altri, di un atlant une vore preziôs des nazions cence stât de Europe.
• Vinars ai 18 di Otubar, aes 21, al Yardie di Pradaman, concert di Ynys (Gales), Remei de Ca la Fresca (paîs catalans) e Giganto (Canton dai Grisons).
• Sabide ai 19 di Otubar aes 10.00 a buinore, al Teatri Gnûf Giovanni da Udine, Scuele Europe (lezion-conciert cui fantats de scuele secondarie superiôr).
• Sabide ai 19 di Otubar aes 18.00 tal ridot dal foyer dal Teatri Gnûf Giovanni da Udine, in colaborazion cul Teatri Stabil Furlan, al sarà il spetacul par furlan"Ce crodistu di fâ?!", un adatament dal test origjinâl "Wat Soesto" di Freark Smink in lenghe frisone.
• Sabide ai 19 di Otubar aes 21, grant finâl cul concierton, di gnûf al Giovanni da Udine.
• Lunis ai 28 di Otubar, ultin apontament, inte suaze de cerimonie di premiazion dai vincidôrs dal Premi leterari in lenghe furlane San Simon, a Codroip, cu la esibizion di Nicole Coceancig (Friûl).

Si segnale ancje che, simpri pal decim aniversari di Suns Europe, e je stade completade la publicazion des playlist dal Festival, che cumò a son disponibilis in mût gratuit su Spotify.