Sigurece e salût publiche, in vore il Decret Retorâl 747/2021 cul Protocol pal acès tal Ateneu e pe partecipazion aes sôs ativitâts
Ancje i students e lis studentis a scugin vê la “Certificazion verde Covid 19”
Cul Decret Retorâl 747/2021 al è stât dât fûr il Protocol pal acès dai students e des studentis aes sedis de Universitât dal Friûl, aes ativitâts didatichis in aule/laboratori e ai servizis, in vore tacant dal 1° Setembar 2021.
Cun vuê par vê acès aes sedis universitariis e pal davuelzi lis ativitâts didatichis in presince ancje i students e lis studentis de universitât a scugin vê la Certificazion verde Covid 19 (green pass) (cemût che al è previodût daûr dal D.L. dai 6 di Avost dal 2021n. 111) e a àn di presentâle se ur ven domandade.
L'intindiment di cheste disposizion al è chel de tutele de salût publiche e dal mantigniment des cundizions di sigurece che a coventin.
Par vê dutis lis informazions in detai e par consultâ il Protocol si à di vierzi cheste pagjine web
