Lunis ai 19/12 a Udin si consegnin i atestâts dai cors di furlan dal 2022
Si cjale un struc de serie tv 'Snait' e al è un incuintri cul regjist Marco D'Agostini
Audiovisîfs di cjalâ, atestâts di consegnâ e un incuintri cul autôr. Al è dut ce che al promet l'ultin event dal an inmaneât de bande dal CIRF de Universitât dal Friûl Lunis ai 19/12 a Udin.
L'apontament al è a 5 dopo di misdì inte Sale Pasolini di Palaç Di Toppo-Wassermann (in Borc Glemone 92), là che a vignaran consegnâts i atestâts dai cors di Lenghe furlane pai dipendents de Aministrazion Publiche finanziâts daûr de L. 482/1999 e di chei di Lenghe e culture furlane pai students de Universitât e pai zovins, inmaneâts cul patrocini de ARLeF e de Societât Filologjiche Furlane e cun Radio Onde Furlane tant che media partner.
Cun di plui e vignarà fate la proiezion di une cerce di Snait. Ricercje e istruzion in Academie, une produzion audiovisive fate de associazion Lenghis dal Drâc e cu la poie dal CIRF cu la regjie di Marco D’Agostini, che al sarà presint pe ocasion.
