Certificazion linguistiche pe lenghe furlane, partît il secont cors
Al è tacât ancje il secont cors inmaneât de Universitât dal Friûl
Joibe il 1n di Dicembar e je stade fate la prime lezion dal secont cors di lenghe furlane che al permet di rivâ a vê competencis linguistichis di nivel C daûr di ce che al previôt il Cuadri Comun European di Riferiment metût adun dal Consei de Europe.
La ativitât didatiche, inmaneade de Universitât dal Friûl, si insuaze tal percors che al à chê di meti in vore il sisteme di certificazion linguistiche pal furlan. Dopo dal bant dât fûr de bande de ARLeF tal mês di Jugn e dopo de selezion dai candidâts cu la creazion di une liste di cuarantevot di lôr (su sessante che a vevin fat domande) che a son risultâts idonis, al è tacât il cors che al coinvolç i prins vincjecuatri de graduatorie.
A son previodudis vincj lezions par un totâl di cincuante oris. La soministrazion dal cors, par cure dal Cirf de Universitât dal Friûl, e cjape dentri lezions in presince e in linie.
Il cors al è compagn di chel che al è stât fat vie pai mês di Setembar, Otubar e Novembar e che si à sierât la setemane stade par ce che al tocje lis lezions, intant che in curt a vignaran fats i esams di verifiche dal aprendiment dai corsiscj e cussì si sierarà dut il percors.
La Vierte passade, simpri inte suaze de metude in vore des normis specifichis de leç regjonâl 29/2007 in cont de certificazion des competencis linguistichis, a jerin stâts prontâts i materiâi didatics pai nivêi A, B e C.
