La Universitât dal Friûl e la Agjenzie Regjonâl pe Lenghe Furlane (ARLeF) a van dilunc a colaborâ inte definizion dal sisteme di certificazion des competencis linguistichis par furlan, che al è previodût de leç regjonâl 29 dal 2007, “Normis pe tutele, pe valorizazion e pe promozion de lenghe furlane". Il Retôr de Universitât, Roberto Pinton, e il president de ARLeF, Eros Cisilino, – presints ancje la professore Fabiana Fusco, delegade dal Ateneu furlan pe inovazion didatiche e pe formazion pal insegnament, e il professôr Enrico Peterlunger, diretôr dal CIRF e delegât pe promozion de lenghe e de culture furlane – ai 24 di Lui stâts a àn firmât un acuardi di pueste, di durade trienâl, che al previôt che l'Ateneu e l'organisim regjonâl di politiche linguistiche a lavorin adun inte organizazion di cors di formazion e di inzornament, inte realizazion e inte publicazion di tescj e di altris materiâi didatics e inte definizion des provis di verifiche e di ricognossiment dai diviers nivei des competencis tal ûs de lenghe furlane. L'acuardi al è par sigûr un passaç impuartant, inte suaze de promozion de lenghe furlane tant che patrimoni, dirit e oportunitât par dute la int che e vîf e che e lavore in Friûl. Cun di fat, il sisteme di certificazion al permet di documentâ in maniere formâl e clare lis competencis linguistichis. Al è alc che al zove al singul individui, che cussì al viôt ricognossût il so nivel di cognossince e di ûs de lenghe furlane, ma ancje, plui in gjenerâl, ae lenghe stesse, stant che e je une formalizazion, in tiermins simbolics e sostanziâi, de sô impuartance e dal so valôr inte societât. Cun di plui la certificazion e je alc di util par dute la coletivitât, tant che garanzie de competence e de professionalitât di cui che al lavore doprant ancje il furlan, inte scuele, inte comunicazion e in ducj chei altri setôrs.