Cors, an 2021

Cors di furlan pai dipendents des aministrazions publichis, une altre edizion cun tantis sodisfazions

A son stâts fats vie pe Vierte, a jerin in linie e a àn partecipât passe cuarante di lôr

A son finîts che nol è tant i cors di nivel di fonde e intermedi inmaneâts vie pe Vierte Universitât dal Friûl de bande dal Centri Interdipartimentâl pal svilup de lenghe e de culture dal Friûl (CIRF).

La iniziative, indreçade ai dipendents des aministrazions publichis, e à vût un grant sucès stant che a son stadis tiradis dongje lis iscrizions di passe cuarante di lôr. Cheste volte a àn partecipât dipendents de Universitât dal Friûl, dal Comun di Udin e de Regjon Friûl-Vignesie Julie, dividûts in doi grups daûr dal grât di cognossince de lenghe: un percors di nivel di fonde cun nozions di fonde su la grafie uficiâl e su la gramatiche de lenghe furlane e un nivel intermedi par rinfuarçâ il lessic e par cognossi miôr lis regulis de grafie e de gramatiche.

I cors di lenghe furlane a son stâts metûts in vore in gracie dai fonts de leç 482 dai 15 di Dicembar dal 1999 (“pe tutele des minorancis linguistichis storichis”) e a rapresentin un imprest zovevul par chei che a lavorin intun Ent Public tal teritori furlanofon e che a àn voie di insiorâ lis lôr competencis linguistichis e duncje ancje il contat cui utents. Cun di plui, si metin in vore ancje lis indicazions de L. R. 29/2007, che e previôt di doprâ la lenghe furlane intai Ents Publics e intes societâts di servizis ae popolazion.

Par vê plui informazions in cont dai cors si pues contatâ la segretarie organizative dal CIRF al numar 0432556480 o pûr mandâ un messaç di pueste eletroniche a (segretarie dal CIRF) o a .