E va indenant la ativitât di formazion linguistiche metude adun de bande dal Cirf a pro dai dipendents des aministrazions publichis. I cors a son sore nuie e a vegnin inmaneâts in gracie dai finanziaments statâi previodûts de leç 482 dai 15 di Dicembar dal 1999, pe tutele des “minorancis linguistichis storichis”.

Finît chel di nivel di fonde, che si à davuelt dai 22 di Març ai 26 di Avrîl, al è tacât di pôc il cors di nivel intermedi, che al va dilunc fintremai ai 3 di Jugn tai dopomisdîs di lunis e di miercus (fale che l’ultin apontament che si fasarà di joibe), di dôs e mieze a cinc e mieze.

Ancje in chest câs lis lezions si davuelzaran su la plateforme informatiche “Microsoft Teams” e ae fin dal percors formatîf al è previodût un esam, di mût di stazâ lis competencis cjapadis su dai 18 partecipants.

Ai corsiscj che a passaran la prove finâl e che a varan frecuentât almancul l’80% des oris ur vignarà dât un atestât di frecuence.

Par vê altris informazions in cont di cheste ativitât si si pues contatâ la segretarie organizative dal CIRF al numar 0432 556480 o scrivi un messaç di pueste eletroniche a cirf@uniud.it (segretarie dal CIRF) o ben a sportel.furlan@uniud.it.