Ce covential insegnâ il furlan tes scuelis? I fruts no fasino confusion daspò cun altris lenghis? No saraial plui util insegnâur l'inglês? Ma pardabon il furlan standard al cope la varietât? Trops sono i bêçs spindûts pe lenghe furlane? No isal di provinciâi insisti su lis lenghis locâls?

Cualchidun dai lûcs comuns su la lenghe furlane, selezionâts e gjavâts fûr de stampe locâl e nazionâl, a deventin ogjet di riflession par cuindis personaçs di nomee leâts al Friûl pe lôr storie personâl e professionâl: Tullio De Mauro, Nereo Perini, Eleanor Callanan, Pierluigi Cappello, Novella Cantarutti, Adriano Ceschia, Lucija Čok, Valter Colle, Lorenzo Fabbro, Furio Honsell, Xavier Lamuela, Domenico Lenarduzzi, Carlo Puppo, Sergio Salvi, Leonardo Zanier. Dal confront des diviersis opinions e sensibilitâts, marcadis di une cognossince profonde dai problemis e di une riflession atente, al nas un document che al invide il letôr a une analisi interessante e a un aprofondiment no dome su ognidun dai argoments frontâts, ma inmò di plui sul dovê di elaborâ e prudelâ un program educatîf des lenghis che al sedi pardabon inovatîf, cun chê di svilupâ un plurilinguisim vêr e zovevul pai citadins di cheste aree di frontiere, laboratori linguistic privilegjât tal cûr de Europe. Il libri al presente lis biografiis dai protagoniscj de indagjin e, cun di plui, ancje une bibliografie e sitografie siore par lâ a fonts dai temis frontâts.

Priscilla De Agostini
Operadore di lenghe furlane, si ocupe di politiche linguistiche e di progjetazion a supuart des lenghis minoritariis. E lavore tai Sportei Linguistics di diviers Ents locâi e teritoriâi de provincie di Udin e di Gurize. Tant che ricercjadore si è ocupade di modei di formazion par insegnants di e in lenghe minoritarie.

Silvana Schiavi Fachin
Insegnante di inglês e di francês, dal 1960 al 1971, e docente di Didatiche des lenghis modernis, di Didatiche dal Furlan e di Educazion plurilengâl te Universitât dal Friûl fintremat al 2005. E ten conferencis, seminaris e cors di formazion par insegnants di lenghis nativis, secondis e forestis sedi in ltalie che tal forest.