Cheste publicazion bilengâl (furlan e talian) e cjape dentri riflessions nassudis tal 2017, in ocasion dai 20 agns de muart di pre Gjilbert Pressac (1945-1997), om di culture e mestri, che cu la sô passion e cognossince al à rindût onôr e merit ae sô tiere. Ordenât predi tal 1970, si è impegnât par dute la vite in studis tal cjamp de musiche sacre e profane, massime par chel che al tocje il teritori furlan e la Glesie di Aquilee, cuntune vision, dut câs, simpri sigurade a un contest mediterani e european. Midiant di chestis ricercjis al è rivât a vê une clâf di leture origjinâl, che nus mostre une interpretazion inmagante des origjinis de Glesie di Aquilee peadis ai Sants Pieri e Marc, in plui des carateristichis teologjichis particolârs di chest cristianisim, cun claris lidrîs judaichis e cristianis. Pre Gjilbert Pressac nus à simpri impressionât pal metodi interdissiplinâr doprât, che i à dade la pussibilitât di lâ insot di apiets che se di no a saressin restâts discognossûts o ignorâts dal dut. In cheste sô ativitât al à lavorât ancje insiemi a diviers docents dal Ateneu furlan. Jenfri lis sôs tantis oparis, no si pues no ricuardâ: Sermone, cantu, choreis et… marculis, publicât de Societât Filologjiche Furlane. Ore presint, i siei numerôs contribûts in diviers setôrs a son stât cjapâts dentri te sô opera omnia, L’arc di San Marc, publicade de Forum par cont de Associazion culturâl “don G. Pressacco”.

Titul: Pre Gjilbert Pressac Gjeni e ricercje jenfri storie de musiche e cristianisim di Aquilee / Don Gilberto Pressacco Genio e ricerca tra storia della musica e cristianesimo aquileiese
Autôrs: Fabio Alessi, Sandro Azaele, Remo Cacitti
Editôr: Forum
Lûc di publicazion: Udine
An di publicazion: 2018
Golaine: Cuaders dal CIRF
Formât: cm 17x24; pagjinis 64
ISBN: 978-88-3283-101-6