A Amedeo Giacomini (Vildivar, 1939 - San Denêl, 2006) i studiôs i àn ricognossude une posizion di rimarc inte stagjon “neodialetâl” de fin dal Nûfcent, e no dome pe scriture poetiche in lenghe furlane, ma ancje pe ativitât critiche e culturâl che al à puartade indenant cence padin par dibot dute la vite. 

I contribûts dâts dongje intal volum, par talian e par furlan, a frontin cualchidun dai aspiets mancul cognossûts, o chei che inte produzion cussì complesse di Giacomini a son restâts platâts, cirint di lei la sô opare midiant di clâfs interpretativis profondis. 

Indi salte fûr la sô capacitât di tiessi leams salts jenfri la produzion par furlan e il panorame leterari dal Paîs, e chest cun dut che al jere a stâ intune tiere che, se suntun plan culturâl e podeve someâ une perifarie, no restave fûr dai savoltaments inedits de realtât sociâl e produtive. 

Intervents di:

• Marco Munaro - Tal grim dal jessi, tra fature e destin: tra Mistirùs e Tal grin di Saturno
• Stefano Strazzabosco - Ancjemò sui animâi intes poesiis furlanis di Amedeo Giacomini
• Gian Mario Villalta - 'I stin chi o de no apartignince. Su Presumût unviâr di Amedeo Giacomini
• Silvia Polo - Manovre, storie di un romanç

Titul: Amedeo Giacomini poesie, romanç e traduzion / Amedeo Giacomini poesia, romanzo e traduzione
Curadôr: Gabriele Zanello
Editôr: Forum
Lûc di publicazion: Udin
An di publicazion: 2023
Golaine: Cuaders dal CIRF
Formât: cm 17x24; pagjinis 112
ISBN: 978-88-3283-445-1