Disleâ lis mans ae lenghe e ae culture dal Friûl par creâ programs politics a pro de comunitât furlane. A son chescj i intidiments dal prin cors regjonâl par aministradôrs e dipendents publics in cont de tutele des minorancis linguistichis. Une iniziative de Comunitât Linguistiche Furlane e dal Cirf de Universitât di Udin. Iscrizions viertis fin ai 6 di Novembar

Meti lis fondis par inzornâ il Statût regjonâl par che il fatôr linguistic e culturâl al sedi ancjemò plui centrâl inte definizion de autonomie dal Friûl-VJ e par che  il furlan, che al è la lenghe proprie de plui part dai residents in Friûl, al vedi la tutele e la promozion che i spietin cu la metude in vore ad in plen de normative statâl e regjonâl (leç statâl 482/99 e leç regjonâl 29/2007) in particolâr par chel che al rivuarde l'ûs public de lenghe.

La professore  Elena D'Orlando, diretore dal Dipartiment di Siencis Juridichis de Universitât di Udin e componente de Comission Paritetiche Stât - Regjon F-VJ, cun chestis considerazions e à mostrât a clâr chês che a puedin jessi lis prospetivis dal prin cors par aministradôrs e dipendents publics in cont de tutele des minorancis linguistichis, inmaneât di bande de ACLiF, la Assemblee de Comunitât Linguistiche Furlane, e dal Cirf, il Centri Interdipartimentâl pal svilup de lenghe e de culture dal Friûl de Universitât di Udin. “Si sin leâts lis mans di bessôi, cumò o podìn ancje disleâses”, e à dite D'Orlando, intervignint ae presentazion dal cors, là che e à zontât ancje che “al covente che inte opinion publiche e madressi une sensibilitât fuarte su chestis cuistions che cussì e puedi stramudâsi in programs politics”. Al incuintri di scree de iniziative, che al è stât fat sabide ai 26 di Otubar li di palaç Belgrât a Udin, a àn partecipât ancje il president de Comunitât Linguistiche Furlane, Markus Maurmair e il diretôr dal Cirf Enrico Peterlunger. Cun lôr a jerin ancje il president de ARLeF (Agjenzie Regjonâl pe Lenghe Furlane) Eros Cisilino e il president de V Comission dal Consei regjonâl Diego Bernardis. La iniziative formative – a àn marcât i organizadôrs – e je stade metude adun cu la cussience dal fat che la tutele des minorancis linguistichis e je un valôr, un dirit e une oportunitât par dute la popolazion dal Friûl - Vignesie Julie e, vuê ancjemò di plui che in passât, e je une fonde de specialitât regjonâl.

A tignî il cors al sarà il dot. Marco Stolfo, dotôr di ricercje in Storie dal federalisim e de unitât europeane, che di agns al lavore su chescj temis sedi in cjamp tecnic e aministratîf, sedi tant che docent e ricercjadôr, ancje in progjets internazionâi tant che il modul Jean Monnet MuMuCEI (Multilingualism, Multiculturalism Citizenship and European Integration). I contignûts dal cors a van de suaze teoriche e normative di riferiment, aes politichis linguistichis, ae lôr planificazion e metude in vore e a cjapin dentri lis ativitâts previodudis dal plan di politiche linguistiche regjonâl pe lenghe furlane, la disponibilitât e l'ûs di imprescj informatics che a favorissin l'ûs public de lenghe e lis pussibilitâts di intervignî a pro dai dirits linguistics dai citadins doprant contribûts e finanziaments publics.

La partecipazion al cors, che al è viert ancje a ducj i interessâts, e je sore nuie. Une des sôs particolaritâts e je chê che al ven fat in cinc localitâts diferentis dal Friûl, daûr di chest program: a  Tresesin (prime lezion ai 7 di Novembar, seconde ai 28); a Caprive (ai 8 e ai 22 di Novembar), a Palme (ai 14 di Novembar e ai 5 di Dicembar), a Tumieç (ai 15 e ai 29 di Novembar) e a Spilimberc (ai 21 di Novembar e ai 6 di Dicembar).
Par notâsi si à di metisi in contat cul Cirf ai numars 0432/556480 e 0432/556486 o ae direzion di pueste eletroniche cirf@uniud.it dentri dai 6 di Novembar. L'orari dai incuintris al è des 6 aes 9 di sere.