Ogni percors al sarà struturât in siet lezions, par un totâl di vincj oris. I prins sîs incuintris a saran di trê oris, intant che la ultime lezion, cuant che si fasarà l'esam finâl, e sarà di dôs oris. Un dai doi cors al scomençarà ai 15 di Lui e al larà indevant ogni lunis e ogni miercus fint ai 2 di Avost, des 15.30 aes 18.30 inte Aule T1 dal Palaç Garzolini Di Toppo Wassermann (vie Glemone 92, Udin); chel altri, invezit, si tignarà dai 2 ai 23 di Setembar, alternantsi tra Palaç Antonini Cernazai (vie Petracco 8, Udin) e Palaç Garzolini Di Toppo Wassermann, simpri cun orari 15.30-18.30.

Intal program dai cors, dongje dai elements di fonde di grafie e di gramatiche e di cualchi nozion di caratar storic e su la produzion culturâl, a vignaran presentâts i imprescj informatics che a son a disposizion par judâ inte scriture dai tescj par furlan e si fevelarà ancje des manifestazions e des ativitâts indreçadis ai zovins.

La ativitât e ven fate cu la colaborazion de ARLeF (Agjenzie Regjonâl pe Lenghe Furlane), de Societât Filologjiche Furlane e de cooperative Informazione Friulana/Radio Onde Furlane. In bande des lezions frontâls, a son in program ancje incuintris sul teritori, par esempli intes sedis de ARLeF e de Filologjiche e intai studis di Radio Onde Furlane.

In zonte il comunicât e il volantin cun dutis lis informazions.