Viodût l’interès stiçât des edizions passadis dai cors di furlan pai dipendents de Aministrazion Publiche, il Centri Interdipartimentâl pal svilup de lenghe e de culture dal Friûl (CIRF) de Universitât dal Friûl al inviarà une gnove edizion dai cors par miorâ lis relazions dai Ents Locâi cul teritori e cui citadins.

Tacant cui 5 di Avrîl dal 2018, cun di fat, al scomençarà un gnûf cicli di incuintris, cun programs di nivel intermedi e avanzât. La ativitât formative e varà une durade di 30 oris, dividudis in 12 lezions che si davuelzaran in aulis dal pôl umanistic dal Ateneu di Udin. Ai corsiscj che a passaran l’esam finâl e che a varan frecuentât almancul l’80% des oris ur vignarà dât un atestât di frecuence cun merit. Il materiâl didatic al sarà dât fûr vie pes lezions, daûr des indicazions dal docent.

La iniziative, che e je metude in vore in gracie de leç 482 dai 15 di Dicembar dal 1999 (pe tutele des minorancis linguistichis storichis), e rapresente un strument zovevul par chei che a lavorin intun Ent Public tal teritori furlanofon e che a àn voie di miorâ lis lôr competencis linguistichis e il contat cui utents. Cun di plui, cheste iniziative e rispuint aes indicazions de L. R. 29/2007, che e previôt di doprâ la lenghe furlane tai Ents Publics e tes societâts di servizis ae popolazion.

Par altris informazions si pues contatâ la segretarie organizative dal CIRF ai numars 0432 - 556480/556484 o pûr midiant di pueste eletroniche a cirf@uniud.it (segretarie dal CIRF) e caterina.rossi@uniud.it (tutor).

In zonte la schede dai cors, il calendari des lezions e il modul di iscrizion.