Coordenadis gjeografichis e culturâls
Il Nord dal Sud, il Sud dal Nord, l'Est dal Ovest e l'Ovest dal Est. In struc a podaressin jessi chestis lis coordenadis par definî la colocazion gjeografiche dal Friûl in Europe. Sù par jù in chê stesse maniere sintetiche, ma salacor cun plui clarece, si podarès presentâ il Friûl tant che la part plui a Nord de aree mediteranie, chê plui a Sud de Europe centrisetentrionâl, chê plui ocidentâl de Europe dal Est, chê plui orientâl di chel che al ven clamât Ocident. In ducj i doi câs a son indicazions che a permetin, in gjenerâl, di dâ une colocazion al Friûl, in particolâr cuntune vision europeane, in tiermins sedi gjeografics che storics e culturâls, evidenziant sot chest profîl la particolaritât di pluralitât, alteritât e contaminazion.
Il Friûl al è chel teritori che si slargje tra lis Alps e l'Adriatic e i flums Livence e Timau. Chês indicazions gjeografichis a cjatin conferme intune lungje tradizion, là che si dan dongje leterature, publicistiche e sagjistiche. Si va di Andrea Vavassore «Guadagnino» cu la sô Vera descritione del Friuli, stampade a Vignesie intal 1553, al storic e gjeograf inglês Thomas Salmon, cu la descrizion dal Friûl che si cjate inte sô opare monumentâl Modern History, or the Present State of all Nations, publicade in plui edizions e in plui lenghis tra il 1739 e il 1766, par rivâ ae seconde metât dal Votcent cun Pacifico Valussi e Prospero Antonini.
Intal asset gjeografic e aministratîf dal Stât talian dal dì di vuê, il Friûl al al corispuint ae plui part de regjon Friûl-Vignesie Julie (cu la ecezion di Triest e di chei altris cinc comuns dongje) e ae porzion plui orientâl de regjon Venit (il Mandament di Puart). In dut, la popolazion dal Friûl e je di sù par jù milion di personis.
Il Friûl, inte sô unitât e unitarietât, al è svariât e plurâl. Par ce che al tocje la gjeografie fisiche e il paisaç a sunin ancjemò buinis in dì di vuê lis peraulis di Ippolito Nievo: «Il Friûl al è un piçul compendi dal univiers, alpin, plan e lagunâr in sessante miis di tramontan a misdì». Alc dal gjenar al vâl ancje pe dimension culturâl, de musiche aes espressions de culture materiâl, che lu rindevin (e lu rindin ancjemò in dì di vuê) alc di diferent.
E je interessante la testemoneance di Guido Piovene, che si cjate tes pagjinis dal so libri, Viaggio in Italia, là che al fevele dal Friûl e de sô int, tacant di chês riis là che il passaç di Ovest di chê che l'autôr le clame «linie Mesc-Livence-Montican» (cun riferiment ae Livence e a doi siei afluents di diestre) al è paragonât al superament di une «grande muraie» e ae jentrade intun mont par so cont.
Il Friûl al è caraterizât de presince di cuatri lenghis diviersis.
No je dome la lenghe dominante: il talian, che tal so ambit, daûr di criteris culturâi, storics e politics, si cjatin ancje i dialets venits.
A son il todesc (cun riferiment aes varietâts locâls austrobavaresis di Tamau, di Sauris, di Sapade e de Val Cjanâl, là che al è fuart ancje il rapuart cu la varietât standard), il sloven, dilunc de fasse orientâl che e va de Val Cjanâl stesse al Gurizan, passant pes Vals di Resie, de Tor e dal Nadison, e il furlan, che al è presint inte plui part dai comuns dal Friûl e al condivît cul sloven e cul todesc la cundizion di lenghe minorizade.