Ultin cors gratuit di lenghe furlane dal 2023 pai dipendents des aministrazions publichis
Al durarà 30 oris e si fasarà in linie dai 21 di Novembar ai 21 di Dicembar
A tornin a tacâ i cors gratuits di lenghe furlane pai dipendents des aministrazions publichis, inmaneâts de bande dal Centri interdipartimentâl pal disvilup de lenghe e de culture dal Friûl (CIRF) de Universitât dal Friûl.
Ai 21 di Novembar si invie l’ultin dai cors previodûts pal 2023, che al larà dilunc fintremai ai 21 di Dicembar.
La ativitât di formazion linguistiche e je dividude in dîs incuintris (il martars e la joibe cun orari 14.30-17.30, par un totâl di 30 oris di lezion) e si fasarà in linie su la plateforme informatiche Microsoft Teams
La tipologjie specifiche dal cors che al vignarà ativât - percors di nivel di base (nozions di fonde de grafie uficiâl e de gramatiche de lenghe furlane) o di nivel intermedi (par rinfuarçâ il lessic e par aprofondî lis regulis di grafie e di gramatiche) - e vignarà definide daûr di chê che e je la domande formative che e saltarà fûr des domandis di partecipazion che a rivaran.
Ai corsiscj che a passaran l’esam finâl e che a varan frecuentât almancul l’80% des oris ur vignarà dât un atestât di frecuence
Cheste ativitât formative e ven metude adun daûr de leç 482 dal 1999, par che i dipendents des aministrazions publichis a puedin cjapâ sù lis competencis linguistichis che a coventin par fâ il ben lôr mistîr di “civil servants” in linie cun ce che a previodin l'articul 6 de Costituzion de Republiche Taliane e lis leçs di tutele, a nivel statâl e regjonâl.
Par vê altris informazions e par notâsi al covente contatâ la segretarie organizative dal CIRF al numar di telefon 0432.556480 o midiant de pueste eletroniche scrivint aes direzions cirf(at)uniud.it (segretarie dal CIRF) o sportel.furlan(at)uniud.it (Sportel pe Lenghe Furlane).
Il modul di iscrizion si pues discjamâlu culì sot o si pues domandâlu par pueste eletroniche a cirf(at)uniud.it o sportel.furlan(at)uniud.it.
![locandine cors di furlan](/fileadmin/user_upload/Cors_par_dipendents_Sierade_2023-1.jpg)