'Plui lenghis, plui vite', ai 15 di Fevrâr a Glemone une cunvigne inmaneade de Lavagne Plurilengâl par memoreâ la Zornade Internazionâl de Lenghe Mari
Chê dai 21 di Fevrâr e je une date impuartante par cui che i ten al pluralisim linguistic e culturâl. Cun di fat, a tacâ dal 2000, e je la Zornade internazionâl de lenghe mari.
La ricorence, proclamade de bande de Conference Gjenerâl de UNESCO ae fin dal 1999, e à chê di promovi il valôr de diversitât linguistiche e il dirit di doprâ la lenghe proprie.
La rilevance de dimension dai dirits linguistics in cheste iniziative e salte fûr a clâr inte date sielzude de UNESCO, stant che ai 21 di Fevrâr al cole l’inovâl di une grande manifestazion fate tal 1952 dai students de Universitât di Dhaka a pro dal ricognossiment de lenghe bengalese (‘bangla’) tant che lenghe uficiâl.
Tra lis altris, in chê dì diviers manifestants a forin copâts de bande des fuarcis di polizie dal Pakistan, che in chê volte al cjapave dentri ancje il Bangladesh, deventât indipendent dome tal 1971.
Memoreâ la Zornade internazionâl de lenghe mari al vûl dî vê cussience che lis lenghis e i dirits linguistics a son alc di impuartant simpri, ducj i dîs e par ducj.
Cun chel intidindiment la Lavagne Plurilengâl, che e je une rêt di istituzions scolastichis e culturâls furlanis impegnadis a pro de promozion de educazion plurilengâl e la tutele de lenghe furlane inte scuele secondarie di secont grât cuntune prospetive multiculturâl e europeane, e inmanee un incuintri public dal titul Plui lenghis, plui vite. Promovi il plurilinguisim inte scuele secondarie di secont grât.
L'apontament al è fissât par miercus ai 15 di Fevrâr, une setemane prime de Zornade internazionâl de lenghe mari, a 3 dopo di misdì inte Aula Magna dal ISIS Magrini-Marchetti.
La jentrade de cunvigne e sarà par cure di Walter Tomada dal ISIS Magrini-Marchetti, a son previodudis lis relazions di Gabriele Zanello de Universitât dal Friûl, che al fevelarà de Fotografie linguistiche 2022/23, il scandai sui compuartaments linguistics dai students inte plui part dal Friûl, e di Ada Bier de Universitât dal Paîs Basc che e fasarà indenant une comparazion, e al sarà spazio ancje par un dibatiment a plui vôs.
La partecipazion al incuintri e je libare e sore nuie. Lis lenghis di lavôr a son il furlan e il talian. Si puedins domandâ altris informazions scrivint ae direzion info(at)lavplu.eu.
