Lusignis 2021 e va dilunc cu la presentazion dal film-documentari “Nel paese di temporali e primule"
Vinars ai 18 di Jugn, aes 9 sot sere a Cjasarse
Lusignis, la rassegne culturâl nassude trê agns indaûr par fâ cognossi e preseâ i lûcs furlans dulà che al ste il grant poete, inteletuâl e regjist Pier Paolo Pasolini, e insiore il so programe di events cu la presentazion dal film-documentari di Andrea D'Ambrosio dal titul "Nel Paese di temporali e di primule".
La opare e je un viaç tal Friûl di Pasolini imbastît mediant di un mosaic di testemoneancis dai siei arlêfs e di chei che al à cognossût e che ur à volût ben. Un collage di intervistis che al cjape dentri ancje i ricuarts e lis contis di Nico Naldini, di Bepi Zigaina, di Ovidi Colus e di cualchi arlêf de scuele di Voleson.
Il film, zirât tal 2000 e restaurât che nol è tant, al sarà a disposizion intune custodie adun cul libri "L'Eden di Pasolini: Il Friuli (1943-1950)", par cure di Paolo Garofalo.
La presentazion si tignarà vinars ai 18 di Jugn aes 9 sot sere tal Broili antîc di Palaç Burovich (sede dal comun) di Cjasarse. Par partecipâ al è obligatori notâsi clamant il numar 0434 873981 o pûr scrivint ae direzion di pueste eletroniche cultura(at)comune.casarsadelladelizia.pn.it.
