“La storie di Lolo il…”, la conte de isrealiane Dvora Omer cumò si pues leile ancje par furlan
La edizion furlane, par cure di Davide Turello e publicade de Forum, e vignarà presentade ai 20 di Jugn a Insic di Cormons
Une biele gnove che e rive de editorie contemporanie in lenghe furlane. Une des contis par fruts plui cognossudis de scritore israeliane Dvora Omer cumò si pues leile ancje par furlan.
Cun di fat, e je stade voltade par furlan dal origjinâl par ebraic, intant che almancul par cumò no esist une sô version taliane, de bande di Davide Turello , linguist e filolic de Universitât di Bamberg (Baviere). La Forum, cul jutori de Agjenzie Regjonâl pe Lenghe Furlane, le à publicade, insiorade ancje des ilustrazions di Pia Valentinis, cul titul di La storie di Lolo il….
Cheste conte, che e fevele di amicizie, di fiducie e di rispiet, e je calcolade tant che un classic de leterature israeliane pai fruts.
La publicazion e vignarà presentade domenie ai 20 di Jugn a 5 dopo di misdì a Insic di Cormons, inte suaze de VI edizion di dialoghi, festival dal gjornalisim e de cognossince che si davuelç intal Friûl orientâl e che tal so program si cjate ancje alc par furlan.
