Lenghe e leterature, identitât e alteritât
Inte produzion leterarie par furlan, intai secui XVI e XVII, tacant des oparis di autôrs tant che Jaroni Sini, Nicolau Morlupin, Jaroni Blancon, Ermes di Colorêt e Eusebi Stele, si palesin ancje une cierte cussience de specificitât linguistiche e la volontât di doprâ la lenghe “tant che lenghe” e “tant che proprie”. E je une sensibilitât che si le viôt ncje in timps plui resints – par esempli cul disvilup des traduzions e de prose tecniche, massime intal Friûl orientâl tacant dal Sietcent, intes diviersis scuelis leterariis dal Nûfcent, intal gjornalisim emergjent in furlan de fin dal Votcent e inte plui part de produzion editoriâl e multimediâl contemporanie.
Cundut de grande minorizazion patide dal furlan e dai furlans massime vie pai ultins centecincuante agns, la percezion di vê une lenghe par so cont, cu la atribuzion a cheste particolaritât di un ciert valôr, almancul in tiermins afetîfs e identitaris, e je ancjemò presinte in dì di vuê e salacor e je cressude juste intai ultins decenis.
Il ricognossiment “di fûr” de specificitât de lenghe furlane, adun cun altris elements culturâi (comprendude la dimension dal Friûl tant che aree multilengâl) che cun chê a determinin la specificitât e la unitât teritoriâl dal Friûl stes, si conferme tra Votcent e Nûfcent, in particolâr intal contest talian. Indicazions di cheste fate si cjatin tes riflessions dal poete e folclorist piemontês Costantin Nigra, che vie pal Votcent al calcole il Friûl tant che «une isule culturâl intate di secui» e lu ten fûr dal so studi sui cjants popolârs in Italie, dongje de Corsiche, de Sardegne e di chês che lis clame «coloniis forestis», ven a dî chês altris comunitâts che un secul dopo, cu la leç statâl 482/1999, a saressin stadis ricognossudis tant che «minorancis linguistichis storichis».
Cun riferiment a ce che al scrîf Costantino Nigra no si pues fâ di mancul di notâ che lis particolaritâts de «isule» Friûl di lui ricognossudis no divegnin dal isolament, ma ben de contaminazion e dal confront cun altris realtâts, plui o mancui di dongje e di lontan.