Cors gratuits di lenghe furlane

Il CIRF al inmanee ogni an une schirie di cors gratuits di lenghe furlane indreçâts ai dipendents de Aministrazion Publiche, in gracie dai finanziaments de leç 482/1999.
Il percors, ricognossût tant che ativitât di formazion di bande dai ents publics, al previôt trê nivei diferents e propedeutics: nivel di fonde, intermedi e avanzât.
Par solit, lis lezions si davuelzin intes sedis dal Ateneu, par un totâl di 30 oris. L'atestât di frecuence al ven dât ai corsiscj che a partecipin almancul al 80% des lezions e che a superin l'esam finâl. Ducj i atestâts a vegnin consegnâts intune cerimonie viers la fin dal an.

Di pôc timp e je stade inviade ancje une propueste pai students e par ducj i zovins che a àn gust di cognossi alc di plui su la lenghe e su la culture dal teritori li che a studiin o indulà che a son a stâ. Il cors si ten intes sedis dal Ateneu (Pôl Umanistic o ben Sientific), par un totâl di 20 oris. Ancje in chest câs, al è previodût un esam finâl par stazâ lis cognossincis dai corsiscj. In plui des lezions in aule, il cors al propon ancje une visite vuidade aes sedis de ARLeF - Agjenzie Regjonâl pe Lenghe Furlane, Societât Filologjiche Furlane e Radio Onde Furlane.

Il CIRF al à colaborât ancje al prin cors su la politiche linguistiche e su la normative di tutele pai aministradôrs locâi, organizât de ACLIF - Assemblee de Comunitât Linguistiche Furlane.