Tutte le notizie

Furlan a scuele, e je ore di lâ... cun “Anìn!”, un gnûf sussidiari i doi volums

Si clame “Anìn!” e al è il gnûf sussidiari pal insegnament intes scuelis doprant la lenghe furlane intes scuelis primariis. Al è stât metût adun daûr di un progjet promovût de ARLeF – Agjenzie Regjonâl pe Lenghe Furlane, cu la poie de Regjon Autonome Friûl-Vignesie Julie, cul intindiment di meti in vore la leç statâl 482/99 e la leç regjonâl 29/2007 intal cjamp de istruzion.

La publicazion, in doi volums (il prin pes classis prime e seconde e il secont per tierce, pe cuarte e pe cuinte) e je stade presentade in maniere uficiâl îr ai 14 di Novembar li dal palaç de Regjon a Udin de assessore regjonâl pe istruzion Alessia Rosolen, dal president de ARLeF Eros Cisilino, dal diretôr de Agjenzie William Cisilino, di Paola Cencini, referente pe lenghe furlane dal Ufici Scolastic Regjonâl e de curadore dal manuâl, Rosalba Perini.

I doi sussidiaris a introdusin il curriculum di e in lenghe furlane dentri dal percors didatic tradizionâl: il prin volum cuntun svicinament graduâl ae lenghe furlane, il secont cun aprofondiments su la storie e su la gjeografie furlane, in plui che su la lenghe e su la leterature. Cun di plui si ten cont de dimension plurilengâl, stant che al è spazi pal confront cu la lenghe inglese, cul talian e cun chês altris lenghis feveladis in Friûl.

I volums a vegnin dâts in maniere gratuite a ducj arlêfs des scuelis primariis che lis lôr fameis a à domandât par lôr l'insegnament dal furlan.

Intai dîs passâts e je tacade la distribuzion dai sussidiaris a ognidun dai 247 ples che a apartegnin a 61 Istitûts comprensîfs e Scuelis paritariis des ex provinciis di Gurize, Pordenon e Udin. Dentri dal mês di Novembar a saran consegnâts passe vincjmil libris. Ai dirigjents scolastics, ai referents pal insegnament de lenghe furlane e a ducj i docents impegnâts intal insegnament dal furlan, ur vignaran consegnâts i doi volums adun cul manuâl didatic specific  “Liniis vuide pai docents”.

Tal complès i àn lavorât parsore cun titui diferents plui di 40 personis e la lôr realizazion e à domandât passe trê agns di lavôr.

Lis tantis imagjins che a insiorin i doi volums a son stadis metudis a disposizion cun gjenerositât di istituzions, museus, ents locâi e privâts di dute la regjon.

La fase di sperimentazion des unitâts didatichis che a componin i doi volums e je stade davuelte cun classis dal Istitût Comprensîf “Tina Modotti” di Premariâs.

Indietro