La sede de Rai dal Friûl-VJ e cîr doi programiscj di lenghe furlane. Il bant al scjât ai 22 di Otubar

La Rai e inmanee une selezion par titui e par provis cun chê di cjoli a vore cun contrat di garzonât cuatri programiscj pe sede regjonâl dal Friûl-VJ.
Doi di chei, in particolâr, a son “di lenghe furlane”.

I programiscj a progjetin, a proponin e a pronti programs radiofonics e/o televisîfs culturâi e di spetacul; a partecipin ae redazion di tescj e a sta daûr de realizazion dai programs.

I candidâts, che no àn di vê plui di 30 agns, a àn di cognossi ben la lenghe furlane, sedi fevelade che scrite, e il lôr nivel di competence al vignarà valutât cuntun prin colocui.

Lis domandis di amission, daûr di ce che al previôt il bant, a àn di rivâ dentri di misdì dai 22 di Otubar dal 2021.