Suns Europe 2022, il belanç de prime part al è une vore positîf. Apontament finâl ai 26 di Novembar e avîs di selezion viert fin ai 31 di Lui

Al è une vore positîf il belanç de prime part di Suns Europe, il festival european des arts in lenghe minorizade, inmaneât de cooperative Informazione Friulana, la editore di Radio Onde Furlane, cu la poie finanziarie de Regjon Autonome Friûl-Vignesie Julie, de ARLeF – Agjenzie Regjonâl pe Lenghe Furlane, dal Comun di Udin, de Fondazion Friuli e cu la colaborazion dal Istitût basc Etxepare e di cetancj altris sogjets publics e privâts, internazionâi e di chenti, che si à davuelte dai 30 di Jugn ai 15 di Lui stâts. Anticipade des proiezions lì dal Visionario dal cine catalan «Alcarràs», che al à vinçût l’Ors di Aur al festival di Berlin, la rassegne e à puartât ator pal Friûl une rapresentance significative de espression artistiche creative e cussiente des comunitâts di minorance de Europe.

In non dal dirit ae lenghe e dal dirit ae diversitât, Suns Europe si à confermât ancjemò une volte une ocasion di incuintri, di confront, di scambi e di colaborazion. Il public al à podût preseâ artiscj furlans di gale tant che Loris Vescovo e  Franco Giordani e discuvierzi e cognossi personaç cun talent e snait, tant che la ocitane Alidé Sans, autentiche ambassadore in chel istès de sô Val di Aran, di dutis lis tieris "d'Oc" e ancje dai Paîs Catalans, il galês Carwyn Elllis, cul so progjet che al met dongje il Gales e il Brasîl, i sarts Mauro Palmas e Frantziscu Medda, cu lis contaminazions jenfri musiche popolâr e eletroniche dal disc Meigama, e la zovine basche Sara Zozaya, che e à presentât lis sôs cjançons intimistis e crepuscolârs.
E je stade ancje la pussibilitât di fâ cualchi resonament in cont di musiche, lenghe, dirits, teritori e autoguvier ancjemò cun Alidé Sans, di frontâ la cuistion dai rifugjâts politics bascs cu la presentazion dal libri Bestaldean di Jaione Dorai e Ernesto Prat e par ricuardâ cun musichis, peraulis e imagjins lis Lotis dal Cormôr, in graciis des vôs di Simone Piva, Alvise Nodale, Nicole Coceancig, Fabrizio Citossi, Devid Strussiat, Corâl La Tela, Guido Carrara e Lussia di Uanis.

La seconde part di Suns Europe si davuelzarà in Novembar: sabide ai 26 li dal Teatri Gnûf “Giovanni da Udine” si fasarà il conciert finâl cui artiscj che a vignaran selezionâts tra ducj chei che dentri dai 31 di Lui a rispuindaran al avîs che al è stât dât fûr un mês indaûr.

Informazions in detai in cont dal festival si cjatin in rêt.