Skip to main content

Al è in rêt il gnûf sît in trê lenghis dedicât ai Boscs di Muçane. Ai 10 di Fevrâr la presentazion uficiâl dal progjet di Artetica

Il sît web dedicât ai boscs di Muçane al è stât inzornât e cumò si pues cjatâlu in rêt ae direzion web, 

Il progjet, par cure de associazion culturâl Artetica, al è stât inviât tant che azion di valorizazion “dal bas” dal preziôs patrimoni forestâl planiziâl che si cjate in chê zone de Basse Furlane

I doi boscs che si cjatin juste a sud dal paîs,a son ce che al reste de antighe Silva Lupanica, il grant bosc che une volte al cuvierzeve dut il plan jenfri i flums Livence e Lusinç. I lôr 300 etars di estension a rapresentin un tesaur inestimabil di biodiversitât.

Il sît web, inte so gnove version, al è stât insiorât di gnûfs contribûts di valôr. Culì si puedin cjatâ informazions di caratar gjenerâl, curiositâts, sezions specifichis su flore e faune, storie, itineraris, materiâl didatic pai fruts di doprâ ancje a scuele e une librarie une vore siore cun passe cincuante titui jenfri articui e tescj sientifics di discjamâ. Cun di plui ducj i siei contignûts a son disposizion par furlan, par talian e par inglês.

Pe realizazion dal progjet, Artetica si è zovade de colaborazion preziose des associazions dal teritori, dal Sportel associât pe lenghe furlane dai comuns di Cjarlins, Gonârs, Muçane, Porpêt, Prissinins e S. Zorç di Noiâr e de consulence sientifiche di studiôs tant che il dotôr Luca Lapini dal Museu Furlan di Storie Naturâl.

Il progjet al è stât metût adun cul jutori di PrimaCassa FVG e cul patrocini dal Comun di Muçane.

Il sît al vignarà presentât intune iniziative publiche a jentrade libare che si davuelzarà Vinars ai 10 di Fevrâr (h. 20:45) inte sale consiliâr di Villa Muciana, a Muçane.
Dilunc de serade al intervignarà Alessandro Fontana, professôr associât di Gjeografie Fisiche e Gjeomorfologjie dal Dipartiment di Gjeosiencis de Universitât di Padue, cunt un intervent dal titul “Boscs, flums e lagunis: evoluzion paleoambientâl e gjeomorfologjie te aree di Muçane”.

Indietro