Un altri an dut par furlan. Ancje pal 2023 il CIRF al à prontât il Lunari dal Ateneu

Ancje pal 2023 il Centri Interdipartimentâl pal Svilup de Lenghe e de Culture dal Friûl (CIRF) al à prontât il Lunari dal Ateneu, gadget bilengâl che al è za deventât une sorte di ogjet di cult.

Intant che intes edizions passadis il Lunari al jere dedicât ae storie de Universitât dal Friûl, tacant des mobilitazions popolârs a pro de sô istituzion e de sô leç istitutive e ricuardant une schirie di personaçs innomenâts dal passât, che a àn vût la funzion di presentâ Dipartiments e cors di lauree, par chest an il Lunari al acompagnarà cui che lu à ae discuvierte dal Ateneu e de sôs struturis che a son a Udin, a Glemone, a Gurize e a Pordenon.