Aller au contenu principal

A tornin i cors gratuits di furlan pai dipendents publics inmaneâts dal CIRF. Al è ancjemò timp par notâsi par chel che al tache ai 11 di Novembar

A tornin a tacâ i cors gratuits di lenghe furlane inmaneâts de bande dal Centri interdipartimentâl pal disvilup de lenghe e de culture dal Friûl (CIRF) de Universitât dal Friûl a pro dai dipendents des aministrazions publichis, cul intindiment che a vedin lis competencis linguistichis che a coventin par fâ il lôr mistîr di “civil servants” in linie cun ce che a previodin l'articul 6 de Costituizion de Republiche Taliane e lis leçs di tutele, a nivel statâl e regjonâl.

La gnove ativitât formative, che e ven metude adun daûr de leç 482 dal 1999, e vignarà screade ai 11 di Novembar e e larà dilunc fintremai ai 14 di Dicembar, intes zornadis di Martars e di Joibe (cun orari: 15.00-18.00), par un totâl di trente oris di lezion e di dîs incuintris.
 
Il cors si fasarà sei in presince, inte Sale dal Lampadari di palaç Caiselli (androne Florio, 2/B, Udin), sei in linie su la plateforme informatiche Microsoft Teams. I corsiscj che a passaran l'esam finâl e a varan frecuentât almancul la 80% des oris a otignaran un atestât di frecuence cun merit. 

Par informazions e par notâsi al è pussibil contatâ la segretarie organizative dal CIRF al numar di telefon 0432 556480 o midiant la pueste eletroniche ae direzion (segretarie dal CIRF) o (Sportel pe Lenghe Furlane). 

Il modul di iscrizion si pues discjamâlu culì.
 

Indaûr