CIRF - Centro Interdipartimentale di Ricerca sulla Cultura e la Lingua del Friuli

Centro Interdipartimentale per lo sviluppo della lingua e della cultura del Friuli “Josef Marchet

Cors gratuits di lenghe furlane par dipendents de Aministrazion Publiche

Cun Novembar a tornin a tacâ i cors di furlan inmaneâts dal Centri Interdipartimentâl pal svilup de lenghe e de culture dal Friûl (CIRF) de Universitât dal Friûl e indreçâts ai dipendents de Aministrazion Publiche.

Stant che la edizion passade e veve stiçât l’interès di cetancj di lôr, ancje par cheste butade a saran proponûts ducj e trê i nivei (fonde, intermedi e avanzât), di maniere di ufrî une ocasion zovevule sedi par cui che si svicine pe prime volte ae lenghe furlane, sedi par cui che al à gust di miorâ lis propris capacitâts e di insiorâ la cognossince dal lessic e de gramatiche. I cors a scomençaran cun vinars ai 16 di Novembar e a laran indevant fin ai 20 di Dicembar, par un totâl di 30 oris di lezion, dividudis in 10 incuintris (zornadis: lunis, joibe e vinars). La ativitât formative si davuelzarà tes aulis dal pôl umanistic dal Ateneu di Udin. Ai corsiscj che a passaran l’esam finâl e che a varan frecuentât almancul l’80% des oris ur vignarà dât un atestât di frecuence cun merit.

A inizi cors i arlêfs a ricevaran une copie dal manuâl “La grafie uficiâl de lenghe furlane”, publicât de ARLeF – Agjenzie Regjonâl pe Lenghe Furlane tal 2016. Vie pes lezions a saran dâts fûr altris materiâi didatics e publicazions, daûr des indicazions dal docent. La iniziative, che e je metude in vore in gracie de leç 482 dai 15 di Dicembar dal 1999 (“pe tutele des minorancis linguistichis storichis”), e rapresente un strument zovevul par chei che a lavorin intun Ent Public tal teritori furlanofon e che a àn voie di insiorâ lis lôr competencis linguistichis e duncje ancje il contat cui utents. Cun di plui, si metin in vore ancje lis indicazions de L. R. 29/2007, che e previôt di doprâ la lenghe furlane tai Ents Publics e tes societâts di servizis ae popolazion.

Par altris informazions si pues contatâ la segretarie organizative dal CIRF al numar 0432556480 o pûr mandâ un messaç di pueste eletroniche a cirf@uniud.it (segretarie dal CIRF) o ben a sportel.furlan@uniud.it.