CIRF - Centro Interdipartimentale di Ricerca sulla Cultura e la Lingua del Friuli

Centro Interdipartimentale per lo sviluppo della lingua e della cultura del Friuli “Josef Marchet

A Udin la scree de Summer School dal NPLD

Cunvigne a Palaç Garzolini di Toppo - Wassermann, ai 13 e ai 14 di Setembar

ARLeF: par doi dîs, Udin capitâl des lenghis europeanis

Il NPLD al à sielt la capitâl furlane par screâ la Summer University. Ai 13 e ai 14 di Setembar, tancj moments impuartants di incuintri, di alt nivel, sul teme de promozion des lenghis minoritariis Par doi dîs, ai 13 e 14 di Setembar, Udin al sarà la capitâl des politichis linguistichis europeanis. Inte citât, di fat, si davuelzarà un moment impuartant di incuintri volût dal Network to Promote Linguistic Diversity (NPLD) - Rêt par Promovi la Diversitât Linguistiche -, su propueste de ARLeF (Agjenzie Regjonâl par Lenghe Furlane) e cul patrocini de Fondazion Coppieters di Brussel, specializade in federalisim e politichis linguistichis. «E sarà une oportunitât uniche pe nestre Regjon – al à sclarît il diretôr de Agjenzie, William Cisilino – stant che o screarìn propit chi la Summer University che l’NPLD al à decidût di inviâ tacant di chest an. In graciis di chest, o varìn la ocasion di ospitâ in Friûl i docents e i esperts plui impuartants a nivel mondiâl su lis politichis linguistichis. Il Network al è une ocasion uniche di confront – al va indevant Cisilino – che nus permet di capî cemût che altris realtâts europeanis a sedin rivadis a garantî un avignî ae lôr lenghe midiant politichis linguistichis buinis». Ae viertidure de Summer University, ospitade de Universitât dal Friûl in Palaç Garzolini di Toppo Wassermann, a saran presints l'assessôr regjonâl cu la deleghe aes lenghis minoritariis, Pierpaolo Roberti; il Sindic di Udin, Pietro Fontanini, il diretôr de ARLeF, William Cisilino e Fabiana Fusco in rapresentance dal Ateneu furlan che al à colaborât ae organizazion di chest prestigjôs apontament internazionâl midiant dal CIRF - Centri interdipartimentâl pal svilup de lenghe e de culture dal Friûl. Lis relazions tecnichis, in program subit dopo, a saran tignudis di Francesc Xavier Vila i Moreno, de Universitât di Barcelone (“Multilinguisim, globalizazion e sostignibilitât linguistiche”); Vesna Crnić-Grotić, de Universitât di Rijeka (“I dirits linguistics”); Sixto Molina, dal Consei de Europe (“La Cjarte europeane pes lenghis regjonâls o minoritariis”); Gabriele Iannàccaro, de Universitât di Milan-Bicocca che, intal so dopli intervent, al indreçarà la analisi sui temis leâts aes fondis sociolinguistichis pe planificazion des lenghis. La dì dopo, François Grin, de Universitât di Gjinevre, al puartarà un so intervent sul teme: “Economie e lengaç: storie, impostazions gjenerâls e interazions fra linguiscj e linguistiche”; Michele Gazzola, de Universitât di Lugano, al fasarà une analisi su la cuistion dal: “Monitorament de politiche linguistiche: struments politics e indicadôrs”; la relazion tra coscj e beneficis des politichis linguistichis e sarà tratade di François Vaillancourt, professôr emerit tal Dipartiment di economie de Universitât di Montréal. L'apontament si davuelzarà a puartis sieradis, stant che la Summer University dal NPLD e je indreçade dome ai membris di cheste Rêt che a rapresentin uns vincj guviers regjonâi e statâi europeans là che si cjatin minorancis linguistichis. La iniziative furlane e viodarà ancje la partecipazion di rapresentants dal Consei de Europe che a varan cussì la ocasion di cognossi miôr la nestre regjon e di “pierdisi” intal clime enogastronomic apassionant di Friûl Doc.

DOCUMENTS