CIRF - Centro Interdipartimentale di Ricerca sulla Cultura e la Lingua del Friuli

Centro Interdipartimentale per lo sviluppo della lingua e della cultura del Friuli “Josef Marchet

Leç Regjonâl 29/2007

Leç regjonâl 18 Dicembar 2007, n. 29

Normis pe tutele, valorizazion e promozion de lenghe furlane

Cjapitul I

Disposizions gjenerâls

 

Art. 1

(Finalitâts)

1.

Metint in vore l'articul 6 de Costituzion e l’articul 3 de leç costituzionâl dai 31 di Zenâr dal 1963, n. 1 (Statût speciâl de Regjon Friûl-Vignesie Julie), la Regjon e tutele, e valorize e e promôf l'ûs de lenghe furlane, tes sôs diviersis espressions, lenghe proprie dal Friûl e part dal patrimoni storic, culturâl e uman de comunitât regjonâl. La Regjon e promôf la ricercje storiche e e fâs une politiche ative di conservazion e disvilup de culture e des tradizions, tant che componentis essenziâls de identitât de comunitât furlane.

2.

Cun cheste leç la Regjon e promôf e e poie lis iniziativis publichis e privadis cun chê di mantignî e incressi l'ûs de lenghe furlane tal so teritori di riferiment.

3.

Cheste leç e covente par slargjâ l'ûs de lenghe furlane tal so teritori di riferiment, rispietant la libare sielte di ogni citadin. I servizis in lenghe furlane che i ents publics e i concessionaris dai servizis publics a garantissin a son oportunitâts pai citadins che a aderissin su la fonde de lôr libare sielte.

4.

La Regjon, te suaze des sôs competencis statutariis, e promôf e e sburte la cognossince e l'ûs de lenghe furlane li des comunitâts dai coregjonâi in Italie e tal mont.

5.

Cheste leç, insiemit cu lis disposizions mandadis fûr pe tutele des minorancis linguistichis slovene e gjermanofone, e met in vore lis politichis de Regjon a favôr des diversitâts linguistichis e culturâls.

Art. 2

(Principis)

1.

Cun cheste leç la Regjon, te suaze sôs competencis, e partecipe ae metude in vore dai principis pandûts:

a) de Declarazion universâl dai dirits dal om, fate de Assemblee gjenerâl des Nazion Unidis ai 10 di Dicembar dal 1948;

b) de Convenzion pe difese dai dirits dal om e des libertâts fondamentâls, ratificade cu la leç n. 848 dai 4 di Avost dal 1955 (Ratifiche e esecuzion de Convenzion pe difese dai dirits dal om e des libertâts fondamentâls firmade a Rome ai 4 di Novembar dal 1950 e dal Protocol adizionâl ae Convenzion stesse, firmât a Parîs ai 20 di Març dal1952);

c) dal Strument de Iniziative Centrieuropeane pe tutele dai dirits di protezion des minorancis, sotscrit a Budapest ai 15 di Novembar dal 1994;

d) dai documents de Organizazion pe sigurece e pe cooperazion in Europe (OSCE) sotscrits de Italie in materie di tutele des lenghis;

e) de Cjarte europeane des lenghis regjonâls o minoritariis, fate buine a Strasburc ai 5 di Novembar dal 1992;

f) dal articul 3 dal Tratât costituzionâl de Union Europeane, firmât a Rome ai 29 di Otubar dal 2004, ratificât daûr de leç n. 57 dai 7 di Avrîl dal 2005.

2.

Cheste leç e met in vore i principis de legjislazion statâl in materie, e in particolâr de leç n. 482 dai 15 di Dicembar dal 1999 (Normis in materie di tutele des minorancis linguistichis storichis), e dal decret legjislatîf n. 223 dai 12 di Setembar da l 2002 (Normis di metude in vore dal Statût speciâl de regjon Friûl-Vignesie Julie pal trasferiment di funzions in materie di tutele de lenghe e de culture des minorancis linguistichis storichis te regjon), tignût cont dai principis e des disposizions de leç regjonâl n. 15 dai 22 di Març dal 1996 (Normis pe tutele e pe promozion de lenghe e de culture furlanis e istituzion dal servizi pes lenghis regjonâls e minoritariis).

Art. 3

(Teritori di aplicazion)

1.

Lis disposizions di cheste leç si aplichin tal teritori di insediament dal grup linguistic furlan delimitât daûr dal articul 5 de leç regjonâl 15/1996.

2.

Cuant che la minorance linguistiche furlane e je distribuide su teritoris provinciâi diviers e pues costituî organisims di coordenament e di propueste che i ents locâi interessâts a àn facoltât di ricognossi.

3.

Iniziativis particolârs pe cognossince e valorizazion dal patrimoni linguistic furlan a puedin jessi sostignudis de Regjon ancje in areis che a son fûr dal teritori dal come 1.

4.

La Regjon e pues stipulâ intesis cu la Regjon Venit par poiâ la lenghe furlane tes areis furlanofonis che a son presintis in chê.

Art. 4

(Rapuarts cun chês altris comunitâts linguistichis)

1.

La Regjon e promôf e e poie iniziativis di colaborazion tra lis istituzions furlanis e chês des comunitâts ladine dal Venit e dal Trentin-Sud Tirôl, e ancje de comunitât rumance dal Cjanton dai Grisons de Federazion elvetiche in particolâr tai setôrs de linguistiche, de istruzion, de formazion e dai mieçs di informazion.

2.

La Regjon e promôf ancje rapuarts di colaborazion tra lis minorancis linguistichis slovene, furlane e gjermanofone che a son tal teritori regjonâl e tra lis lôr istituzions e e poie progjets comuns che a valorizin lis diversitâts linguistichis e culturâls.

Art. 5

(Ûs de grafie uficiâl de lenghe furlane)

1.

E je cjapade tant che grafie uficiâl de lenghe furlane chê definide daûr dal articul 13 de leç regjonâl 15/1996.

2.

La grafie de lenghe furlane e pues jessi modificade cun decret dal President de Regjon, daûr de propueste de ARLeF – Agjenzie regjonâl pe lenghe furlane, in cunvigne cu lis Universitâts di Udin e di Triest.

2 bis.

Dentri dai 30 di Jugn 2011 il President de Regjon, scoltadis I'ARLeF e lis Universitâts dai Studis di Udin e di Triest, al cjape sù cuntun decret la grafie uficiâl des variantis de lenghe furlane.

3.

La Regjon e promôf e e sosten l'ûs de grafie uficiâl de lenghe furlane, tes sôs diviersis espressions, te concession dai contribûts e finanziaments previodûts in aplicazion di cheste leç, ancje se no specificât tai lôr bants. L'ûs di variantis locâls tai tescj scrits no je cause di esclusion di finanziaments e contribûts publics.

4.

I ats e i documents in lenghe furlane de Regjon, dai ents locâi e dai lôr ents strumentâi e concessionaris di servizis publics a son scrits te grafie uficiâl.

Notis:

1

Zontadis peraulis al come 1 dal art. 186, come 1 letare a), L. R. 17/2010

2

Zontadis peraulis al come 2 dal art. 186, come 1 letare b), L. R. 17/2010

3

Zontât il come 2 bis dal art. 186, come 1 letare c), L. R. 17/2010

4

Sostituidis peraulis dal come 4 dal art. 186, come 1 letare d ), L. R. 17/2010

 

Cjapitul II

Ûs public lenghe furlane

 

Art. 6

(Ûs public de lenghe furlane)

1.

L'ûs de lenghe furlane al è permetût tai rapuarts cui uficis dai ents locâi e dai lôr ents strumentâi che a lavorin tal teritori delimitât daûr dal articul 3.

2.

Tai rapuarts cu la Regjon e i siei ents strumentâi , il dirit di doprâ la lenghe furlane al pues jessi esercitât cence tignî cont dal teritori li che i siei uficis a son logâts.

3.

Cuant che une istance e je inviade in lenghe furlane ancje la rispueste e je dade dai ents dai comis 1 e 2 in cheste lenghe.

4.

Lis disposizions dai comis 1 e 3 si aplichin ancje ai concessionaris di servizis publics dai ents segnâts tai comis 1 e 2, che a lavorin tal teritori delimitât daûr dal articul 3.

5.

I ents dal come 1 a garantissin, ancje in forme associade, l'esercizi dai dirits dai comis 1 e 3.

6.

In nissun câs l'ûs de lenghe furlane tai procedime nts aministratîfs nol pues compuartâ che a costin di plui o che i metin plui timp.

7.

I ents interessâts a viodin de aplicazion progressive des disposizions di chest articul, daûr dai progjets dai obietîfs anuâi, tai plans di politiche linguistiche daûr dal articul 27.

Note:

1

Declarade, cun sentence de Cort Costituzionâl n. 159, depositade ai 22 di Mai 2009, l'ilegjitimitât costituzionâl dal come 2.

Art. 7

(Certificazion linguistiche)

1.

La cognossince de lenghe furlane e je atestade di une certificazion linguistiche dade fûr di sogjets publics e privâts abilitâts.

2.

La certificazion linguistiche e je vierte a ducj chei che a àn lis carateristichis previodudis dal come 3.

3.

Lis modalitâts, i criteris e lis carateristichis domandadis par rivâ ae certificazion linguistiche a son definîts, tignût cont des propuestis dal ARLeF, cun regolament regjonâl di mandâ fûr dentri di sîs mês de date di jentrade in vore di cheste leç.

4.

La ARLeF e promôf la organizazion di cors di formazion e di inzornament par rivâ ae certificazion linguistiche de lenghe furlane.

5.

La liste dai sogjets publics e privâts abilitâts ae concession de certificazion linguistiche e je compilade de Regjon, daûr de propueste de ARLeF, e e je inzornade an par an.

6.

Cun chê di promovi la certificazion linguistiche pal personâl dal compart unic regjonâl, la ARLeF, in cunvigne cui singui ents, e promôf la organizazion di cors di formazion e di inzornament e favorìs la frecuence ancje cun incentîfs specifics al personâl.

Art. 8

(Ats e informazions di caratar gjenerâl)

1.

I ats comunicâts ae gjeneralitât dai citadins dai sogjets dal articul 6, a son scrits, in plui che par talian, ancje par furlan.

2.

I sogjets dal articul 6 a fasin la comunicazion istituzionâl e la publicitât dai ats destinade al teritori delimitât daûr dal articul 3 par talian e par furlan.

3.

La presince de lenghe furlane e je garantide in ogni câs ancje te comunicazion istituzionâl e te publicitât dai ats destinade a dute la regjon.

4.

Il test e la comunicazion in lenghe furlane a àn la stesse evidence, ancje tipografiche, di chei in lenghe taliane.

5.

I ents interessâts a viodin de aplicazion progressive des disposizions di chest articul, daûr dai progjets dai obietîfs anuâi, tai plans di politiche linguistiche dal articul 27.

Notis:

1

Declarade, cun sentence de Cort Costituzionâl n. 159, depositade ai 22 di Mai 2009, l'ilegjitimitât costituzionâl dai comis 1 e 3.

Art. 9

(Organisims eletîfs e colegjâi)

1.

Daûr dal articul 7 de leç 482/1999, tai comuns che a son dentri te delimitazion dal articul 3, i membris dai conseis comunâi e di chei altris orghins cun struture colegjâl de aministrazion stesse a àn dirit di doprâ, te ativitât dai organisims stes,la lenghe furlane.

2.

Cun di plui, il come 1 al cjate aplicazion pai conseîrs regjonâi e ancje pai membris dai conseis des associazions intercomunâls e des unions di Comuns, des Comunitâts di Mont e des Provinciis che a cjapin dentri Comuns li che e je ricognossude la lenghe furlane.

3.

Lis modalitâts par garantî la traduzion a chei che no capissin la lenghe furlane a son regoladis dai ents dai comis 1 e 2 cun disposizions dai plans di politiche linguistiche dal articul 27, che tal lôr ambit al pues jessi previodude la ripetizion dai intervents in lenghe taliane o ben il dipuesit contestuâl dai tescj voltâts par scrit.

Notis:

1

Declarade, cun sentence de Cort Costituzionâl n. 159, depositade ai 22 di Mai 2009, l'ilegjitimitât costituzionâl dal come 3.

Art. 10

(Cartelonistiche in lenghe furlane)

1.

Tal teritori delimitât daûr dal articul 3, i cartei, lis insegnis, i supuarts visîfs e ogni altre indicazion di utilitât publiche pandude al public tai bens imobii sede di uficis e struturis operativis dai sogjets dal articul 6 a àn dongje la traduzion in lenghe furlane cu la stesse evidence grafiche dal talian.

2.

I sogjets dal articul 6 a doprin la lenghe furlane cu la stesse evidence grafiche dal talian ancje tes scritis esternis, tai supuarts visîfs e tai mieçs di traspuart. Tal câs che te erogazion dal servizi di traspuart public a sedin previodûts servizis automatics di comunicazion vocâl, chescj a son dâts ancje in lenghe furlane.

3.

Tal teritori delimitât daûr dal articul 3, come 1, la cartelonistiche stradâl e mostre i toponims ancje in lenghe furlane, daûr des modalitâts previodudis dal articul 11.

4.

I sogjets dal articul 6 si justin daûr des previsions di chest articul, daûr dai progjets dai obietîfs anuâi, tai plans di politiche linguistiche dal articul 27.

Art. 11

(Toponomastiche in lenghe furlane)

1.

La denominazion uficiâl in lenghe furlane di comuns, frazions e localitâts e je fissade de Regjon, daûr de propueste de ARLeF, tignût cont des variantis locâls, e di intese cui Comuns interessâts dentri di sîs mês de date di jentrade in vore di cheste leç.

2.

Lis deliberazions de Zonte regjonâl che a tocjin lis denominazions uficiâls in lenghe furlane e ogni altre cuistion gjenerâl che e tocje i toponims e i idronims in lenghe furlane a son fatis buinis cun decret dal President de Regjon di publicâ tal Boletin uficiâl de Regjon.

3.

Simpri restant bon ce che al è previodût dal articul 7, prin come, numar 3), dal Statût speciâl, i sogjets dal articul 6 a doprin dentri de aree delimitade daûr dal articul 3, dongje de denominazion in lenghe taliane ancje la denominazion in lenghe furlane dai comuns, des frazions e des localitâts, definide daûr dal come 1.

4.

La Regjon e je autorizade a stipulâ convenzions cun altris aministrazions publichis e cun sogjets privâts par promovi l'ûs des denominazions uficiâls in lenghe furlane.

5.

I ents locâi a puedin fissâ, daûr de deliberazion conforme dai lôr conseis eletîfs, di doprâ toponims bilengâi o toponims dome te lenghe furlane. La denominazion sielzude e devente la denominazion uficiâl par ducj i efiets.

Notis:

1

Declarade, cun sentence de Cort Costituzionâl n. 159, depositade ai 22 di Mai 2009, l'ilegjitimitât costituzionâl dal come 5.

 

Cjapitul III

Intervents tal setôr de istruzion

 

Art. 12

(Lenghe furlane e educazion plurilengâl)

1.

L'aprendiment e l'insegnament de lenghe furlane a son metûts dentri intun percors educatîf plurilengâl che al previôt, dongje de lenghe taliane, la compresince di lenghis minoritariis storichis e di lenghis forestis. Il percors educatîf plurilengâl al fâs part de formazion par une citadinance europeane ative e di valorizazion de specificitât de Regjon.

2.

Daûr dal articul 4, comis 1, 2, 3 e 4, de leç 482/1999, tes scuelis de infanzie, tes scuelis primariis e secondariis di prin grât che a son tai Comuns delimitâts daûr dal articul 3, la lenghe furlane, e je metude dentri tal percors educatîf, daûr des modalitâts specifichis che a corispuindin al ordin e al grât scolastic, tignint cont dal articul 1, come 2, dal decret legjislatîf 223/2002.

3.

Simpri restant buine la autonomie dai istitûts scolastics, tal moment de iscrizion i gjenitôrs o cui che al fâs lis funzions, dopo de juste informazion, daûr de domande scrite de istituzion scolastiche, i comunichin la lôr volontât di no zovâsi dal insegnament de lenghe furlane. La opzion pandude e je valide pe durade de scuele de infanzie, di chê primarie e di chê secondarie di prin grât e e pues jessi modificade, daûr de domande dai gjenitôrs o di chei che a fasin lis funzions, sul tacâ di ogni an scolastic.

Notis:

1

Declarade, cun sentence de Cort Costituzionâl n. 159, depositade ai 22 di Mai 2009, l'ilegjitimitât costituzionâl dal come 3.

Art. 13

(Coordenament interistituzionâl)

1.

La Regjon e colabore cul Ufici scolastic regjonâl pal Friûl Vignesie Julie par garantî che la lenghe furlane e jentri in maniere armoniche tal sisteme scolastic e par coordenâ lis iniziativis di politiche linguistiche in cjamp educatîf.

2.

La Regjon, in colaborazion cu lis autoritâts scolastichis e rispietant la autonomie scolastiche, e promôf il coordenament tra lis istituzions scolastichis, e favorìs la costituzion di rêts di scuelis e la individuazion di scuelis che a fasin di pivot tal teritori.

3.

La Regjon e colabore e e stipule convenzions pe istituzion permanente di percors di inzornament e formatîfs che a dedin abilitazion, cun dentri azions pe formazion iniziâl e in servizi, pe scuele dispecializazion, par cors di master e di dotorât di ricercje, pal insegnament o pal ûs de lenghe furlane daûr di ce che al è previodût dal articul 6 de leç 482/1999.

4.

E je istituide la Comission permanente pal insegnament de lenghe furlane, li de Direzion centrâl competente, par garantî il coordenament de ativitât fate des diviersis istituzions tal meti in vore cheste leç.

5.

La Comission e je presiedude dal Assessôr regjonâl competent in materie di istruzion o di un so delegât e e je componude dal Diretôr centrâl competent te stesse materie o un so delegât, e in plui cinc esperts te suaze de tutele, valorizazion e insegnament de lenghe furlane.

5 bis.

La Comission e je nomenade cun decret dal President de Regjon daûr deliberazion de Zonte Regjonâl e e reste in cjarie par trê agns scolastics a tacâ de date di nomine.

Notis:

1

Sostituît il come 5 dal art. 11, come 18 letare a),L.R. 11/2011

2

Zontât il come 5 bis dal art. 11, come 18 letare b), L.R. 11/2011

3

Viôt la dissipline transitorie fissade dal art.11, come 19, L.R. 11/2011

Art. 14

(Cjamp di aplicazion tes scuelis)

1.

Rispietant la autonomie scolastiche e lis disposizions dal decret dal President de Republiche 8 di Març dal 1999, n. 275 (Regolament su lis normis in materie di autonomie des istituzions scolastichis, daûr dal articul 21 de leç 15 di Març dal 1997, n. 59), lis scuelis che a son tai Comuns delimitâts daûr dal articul 3 a individuin te programazion dal insegnament de lenghe furlane il model educatîf di aplicâ, ancje in coerence cu lis specificitâts dal contest socioculturâl.

2.

Cun regolament di metude in vore mandât fûr, dopo di vê sintût l'Ufici scolastic regjonâl, dentri di sîs mês de date di jentrade in vore di cheste leç, la Regjon, daûr dal articul 1, come 2, dal decret legjislatîf 223/2002 e dal decret dal Ministri de istruzion publiche n. 47 dai 13 di Jugn dal 2006 (Cuote orari dai curricula risiervade aes istituzions scolastichis), e definìs il plan di aplicazion di sisteme cu lis articolazions e cu lis specificitâts pai diviers ordins e grâts scolastics segnâts tal articul 12, come 2. L'insegnament de lenghe furlane al è garantît par almancul une ore par setemane dilunc di dut l’an scolastic, te cuote di flessibilitât de autonomie scolastiche.

3.

Te programazion dal insegnament de lenghe furlane di bande des istituzions scolastichis a son dentri lis modalitâts didatichis che a cjapin tant che model di riferiment il metodi fondât sul aprendiment veicolâr integrât des lenghis.

4.

Tes scuelis secondariis di secont grât, e je promovude la programazion dal insegnament de lenghe furlane tai progjets di inricjiment de ufierte formative des istituzions scolastichis.

Notis:

1

Declarade, cun sentence de Cort Costituzionâl n. 159, depositade ai 22 di Mai 2009, l'ilegjitimitât costituzionâl dal come 3 e dal ultim periodi dal come 2.

Art. 15

(Sostegn finanziari aes scuelis e e verifiche)

1. Pes finalitâts dal articul 13, come 2, e dal articul 14, la Regjon e proviôt al trasferiment dai finanziaments aes istituzions scolastichis daûr dal numar des oris di insegnament e di ûs curicolâr de lenghe furlane rilevadis e comunicadis dal Ufici scolastic regjonâl. I trasferiments finanziaris, gjestîts des singulis istituzions scolastichis, a son destinâts aes spesis pai docents impegnâts te metude in vore di cheste leç e pes spesis organizativis des scuelis. Chestis risorsis a son dopradis rispietant lis normativis in vore e i contrats di lavôr inviâts.

2.

La Regjon e sosten ancje pal aspiet finanziari lis iniziativis dal articul 14, comis 3 e 4.

3.

La ARLeF, su la fonde des dibisugnis individuadis an par an, in colaborazion cul Ufici scolastic regjonâl, e propon lis modalitâts di aplicazion des misuris di sostegn finanziari previodudis pes istituzions scolastichis, valorizant chês che a aplichin i modei di insegnament de lenghe furlane plui avanzâts, dentri di une suaze plurilengâl, daûr dal nivel di riferiment european.

4.

In colaborazion cul Ufici scolastic regjonâl, la ARLeF e verifiche e e valute an par an, cun modalitâts concuardadis, il stât di aplicazion dal insegnament e dal ûs de lenghe furlane tes istituzions scolastichis, l’efiet su lis competencis dai students e la rispueste des fameis.

5.

Lis singulis scuelis a judin a verificâ e valutâ an par an l’insegnament e l’ûs de lenghe furlane cu lis ativitâts gjenerâls di verifiche e di valutazion fatis des scuelis stessis.

Art. 16

(Materiâl didatic)

1.

La Regjon e sosten la produzion di materiâl didatic pal insegnament de lenghe furlane e te lenghe furlane, tes sôs diviersis espressions, elaborât daûr des liniis segnadis dal ARLeF.

Art. 17

(Docents)

1.

Daûr dal articul 1, come 2, dal decret legjislatîf 223/2002, par definî la suaze des dibisugnis di organic tal teritori delimitât daûr dal articul 3, la Regjon e colabore cul Ufici scolastic regjonâl par aciertâ lis risorsis di personâl docent cun competencis te lenghe furlane in servizi tes istituzions scolastichis de regjon, par cjapâ sù la declarazion di disponibilitât individuâl dai insegnants.

2.

La Regjon e garantìs e e sosten i percors di formazion e di inzornament dai insegnants di lenghe furlane e in lenghe furlane cun convenzions cu lis Universitâts dal teritori regjonâl.

3.

La Regjon e cjape lis misuris finanziariis par sostignî la formazion al sisteme Content and Language Integrated Learning (CLIL) in lenghe furlane, individuant percors formatîfs adats cu lis Universitâts competentis, cul Ufici scolastic regjonâl e cu lis istituzions scolastichis.

4.

Simpri restant bon ce che al è previodût de normative in materie di stât juridic dal personâl docent e dal contrat di lavôr dal personâl, la Regjon, dacuardi cu lis autoritâts scolastichis, dopo sintudis lis organizazions sindicâls, e viôt di istituî une liste dai insegnants cun competencis ricognossudis pal insegnament de lenghe furlane.

5.

Cun regolament regjonâl di mandâ fûr in cunvigne cul Ufici scolastic regjonâl a son definidis lis modalitâts pal acès te liste dal come 4 e pal ûs dal personâl docent iscrit te liste stesse.

Art. 18

(Intervents di promozion)

1.

La Regjon e met in vore iniziativis di informazion e sensibilizazion indreçadis aes fameis par difondi la cognossince dai obietîfs e des carateristichis dal plan di introduzion de lenghe furlane tal sisteme scolastic.

2.

Daûr des disposizions de leç 482/1999, la Regjon e fâs la sô part par sostignî lis iniziativis di insegnament de lenghe furlane indreçadis ai grancj, inviadis de Universitât dal Friûl, des scuelis e di altris sogjets ricognossûts.

3.

La Regjon e promôf cors e iniziativis specifichis dedicadis al insegnament de lenghe furlane pai imigrâts presints tes areis delimitadis.

4.

La Regjon e pues sostignî l'insegnament de lenghe furlane ancje tes istituzions scolastichis che a son tai teritoris lassâts fûr de delimitazion dal articul 3 come 1.

5.

Formis particolârs di promozion, di svicinament e di insegnament de lenghe furlane a son inviadis pes popolazions di origjin furlane residents tal forest.

6.

Cun regolament regjonâl a son regolâts lis carateristichis, lis modalitâts e i criteris pal sostegn finanziari dai intervents previodûts di chest articul. Il regolament al è mandât fûr, dopo dal parê de Comission consiliâr competente, dentri di sîs mês de date di jentrade in vore di cheste leç. La Comission e da il so parê dentri di 30 dîs de domande; se al passe chest tiermin si fâs di mancul dal so parê.

Art. 19

(Insegnament volontari de lenghe furlane)

1.

Par favorî l'aprendiment e l'ûs de lenghe furlane di bande dai citadins, la Regjon e promôf la ativitât di volontariât pal insegnament de lenghe furlane.

2.

Pes finalitâts dal come 1, al è istituît li dal ARLeF, il regjistri dai volontaris pal insegnament de lenghe furlane.

3.

A puedin jessi ricognossûts volontaris lis personis maiôrs di etât di marilenghe furlane che a declarin la lôr disponibilitât a fâ a titul gratuit, cun modei organizatîfs e cun modalitâts operativis definidis dal ARLeF, ativitâts par difondi la cognossince e l'ûs de lenghe furlane.

 

Cjapitul IV

Intervents tal setôr dai mieçs di comunicazion

 

Art. 20

(Radio e television)

1.

La Regjon e sosten la produzion di materiâi audiovisîfs in lenghe furlane par dâur la plui grande difusion.

2.

Tal setôr televisîf, la Regjon e sosten la produzion e la emission di programs in lenghe furlane, tes sôs diviersis espressions. Il sostegn al è proporzionât ae cuviertidure teritoriâl e aes modalitâts di inseriment tal palinsest. I fonts a son impegnâts almancul pal 75 par cent pe produzion che almancul pal 60 par cent e je fate di produtôrs indipendents.

1.

Cun regolament mandât fûr cun decret dal President de Regjon, sintude la Comission consiliâr competente, a son definîts criteris e modalitâts par meti in vore i intervents di sostegn previodûts des disposizions di chest Cjapitul.

 

Cjapitul V

Intervents in pro des realtâts associativis

 

Art. 24

(Realtâts associativis)

1.

La Regjon e ricognòs une funzion speciâl di servizi ai sogjets publics e privâts che a fasin une ativitât cualificade e continuative tal teritori regjonâl pe promozion e difusion de lenghe furlane e che a vedin struturis stabilis e une organizazion suficiente .

2.

Pes finalitâts dal come 1, la Regjon e sosten la ativitât di chescj sogjets:

a) Associazion culturâl Colonos di Vilecjaze, Listize;

b) Associazion Glesie Furlane di Vilegnove di S. Denêl;

c) Associazion culturâl "la Grame"di Merêt;

d) Clape di culture Patrie dal Friûl di Glemone;

e) associazion culturâl Istitût Ladin Furlan Pre Checo Placerean di Codroip;

f) Cooperative di Informazion Furlane, soc. coop a r.l. di Udin;

g) Radio Spazio 103 s.r.l. di Udin;

h) Kappa Vu s.a.s. di Udin.

3.

La regjon e sosten i sogjets daûr dal come 2 cun finanziaments specifics fissâts an par an cun norme di leç finanziarie regjonâl.

3 bis.

Lis domandis pe concession dal finanziament a son di presentâ al Servizi competent de Direzion centrâl pe culture dentri dai 31 Zenâr di ogni an. Lis domandis à an in zonte la relazion de ilustrazion di ativitât programade cul so preventîf di spese specific. Cul decret di concession al pues jessi erogât in anticip il 100 par cent dal finanziament e a son fissâts i timps e mûts di rendicontazion. Chest procediment al è dissiplinât de leç regjonâl ai 20 di Març, n. 7 (Test unic des normis in materie di procediment aministratîf e dirit di acès).

3 ter.

La Regjon e ricognòs ae Società Filologica Friulana - Societât Filologjiche Furlane G.I. Ascoli di Udin - une mansion di impuartance primarie e le sosten par che e rivi aes sôs finalitâts istituzionâls traviers di un finanziament anuâl, daûr des modalitâts dal come 3 bis.

Notis:

1

Sostituît il come 2 dal art. 6, come 99 letare a ), L. R. 11/2011

2

Sostituît il come 3 dal art. 6, come 99 letare b ) , L. R. 11/2011

3

Zontât il come 3 bis dal art. 6, come 99 letare c ) , L. R. 11/2011

4

Zontât il come 3 ter dal art. 6, come 99 letare c ), L. R. 11/2011

5

Viôt la dissipline transitorie fissade dal art.6, come 100, L.R. 11/2011

 

Cjapitul VI

Programazion

 

Art. 25

(Plan gjenerâl di politiche linguistiche)

1.

Il Plan gjenerâl di politiche linguistiche (PGJPL) al è definît di norme ogni cinc agns par rivâ a chescj obietîfs:

a) garantî ai citadins di lenghe furlane l'esercizi dai dirits linguistics;

b) promovi l'ûs sociâl de lenghe furlane e il so disvilup tant che codiç linguistic bon par dutis lis situazions de vite moderne;

c) cirî di rivâ a une politiche linguistiche unitarie, cul coordenament des azions programadis di altris ents e istituzions publichis e privadis;

d) fissâ lis prioritâts dai intervents regjonâi tal setôr de istruzion;

e) fissâ criteris e prioritâts par intervents tal setôr dai mieçs di comunicazion e pal sostegn aes realtâts associativis.

2.

Il PGJPL al è spartît par tipologjiis di sogjets. Par ogni tipologjie a son previodudis areis specifichis di intervent e, par ognidune di chês, progjets alternatîfs dai obietîfs.

3.

Il PGJPL e fisse, cun di plui, lis modalitâts di valutazion des iniziativis fatis e i struments di verifiche dai risultâts otignûts di ogni sogjet.

4.

Il PGJPL al è proponût de ARLeF e al è fat bon cun decret dal President de Regjon, dopo sintude la Comission consiliâr competente, e al è publicât sul Boletin uficiâl de Regjon.

Art. 26

(Plan des prioritâts di intervent)

1.

Su la fonde dal PGJPL e tignint cont des disponibilitâts di belanç, la Zonte regjonâl, daûr de propueste de ARLeF, e cjape an par an il Plan des prioritâts di intervent, cun dentri i obietîfs di otignî in chel an.

2.

Il Plan des prioritâts di intervent al fisse cualis iniziativis previodudis di cheste leç che a son ritignudis prioritariis e tropis risorsis che a son destinadis a ogni setôr o a ogni grup di intervents.

3.

Il Plan des prioritâts di intervent al à dongje i siei bants e al segne lis proceduris pe presentazion di progjets che par chei al ven domandât il finanziament.

4.

Par garantî la trasparence, al plan i son zontâts ancje i criteris gjenerâi pe valutazion di progjets

.

Art. 27

(Plans di politiche linguistiche)

1.

La Regjon, i ents locâi e i concessionaris di servizis publics a fasin bon ogni cinc agns, un Plan speciâl di politiche linguistiche (PSPL) par fissâ, su la fonde dal Plan gjenerâl di politiche linguistiche (PGPL), i progjets dai obietîfs di otignî an par an in ogni aree di intervent, cun scjadincis che in nissun câs no podaran lâ fûr de durade dal plan stes.

2.

La Regjon, i ents locâi e i concessionaris di servizis publics a previodin tai plans speciâi di politiche linguistiche il justament progressîf de organizazion e des struturis tecnichis par meti in vore ce che al è previodût tal Cjapitul II.

3.

La aprovazion e la aplicazion conforme dai Plans speciâi di politiche linguistiche a son pai ents locâi e pai concessionaris di publics servizis cundizions par otignî i finanziaments di cheste leç tai agns dopo.

 

Cjapitul VII

Metude in vore e verifiche

 

Art. 28

(ARLeF e Comission pal ûs sociâl de lenghe furlane)

1.

La Regjon e individue te ARLeF - Agjenzie regjonâl pe lenghe furlane, l'organisim competent pe definizion dai indreçaments di politiche linguistiche pe lenghe furlane e pal coordenament e pe verifiche de metude in vore dai intervents di cheste leç.

2.

Ae ARLeF i tocje in particolâr di:

a) proponi il Plan gjenerâl di politiche linguistiche pe lenghe furlane;

b) proponi an par an lis prioritâts di intervent, ancje tignint cont des disponibilitâts finanziariis;

c) furnî consulence pe predisposizion di bants pe assegnazion dai contribûts finanziaris a istituzions, ents e associazions impegnadis te aplicazion di cheste leç;

d) istituî, ancje in colaborazion cun altris sogjets, un sisteme di certificazion pai fins dal articul 7 daûr des liniis segnadis dal Cuadri comun european  di riferiment pes lenghis cjapât cun risoluzion dal Consei di Europe tal Novembar dal 2001;

e) verificâ an par an l’efiet des iniziativis sostignudis sul ûs de lenghe furlane.

3.

Pe definizion dai indreçaments di politiche linguistiche, la ARLeF si zove de Comission pal ûs sociâl de lenghe furlane, nomenade cun decret dal President de Regjon.

4.

La Comission componude di rapresentants des categoriis economichis e produtivis, dai ordins professionâi e des organizazions sindicâls che a lavorin tal teritori delimitât daûr dal articul 3, e je istituide li dal ARLeF cun funzions consultivis e di propueste.

Notis:

1

Integrade la dissipline dal art. 15, come 23, L. R.18/2011

2

Viôt la dissipline transitorie fissade dal art. 15, come 24, L.R. 18/2011

Art. 29

(Clausule valutative)

1.

La Zonte regjonâl e presente al Consei regjonâl relazions anuâls sul stât di metude in vore di cheste leç, dentri dal mês di Fevrâr dal an dopo di chel di riferiment.

2.

Lis relazions, ancje su la fonde des verifichis fatis e des informativis dadis de ARLeF, a rispuindin a chestis domandis:

a) cemût che a son lis sieltis cjapadis dai diviers sogjets tai Plans speciâi di politiche linguistiche rispiet ai obietîfs fissâts tal Plan gjenerâl e cemût che i intervents fats, cun evidence des diferencis, se a son, rispiet a ce che programât;

b) cuâi che a son i ponts critics cjatâts te programazion e te gjestion dai diviers intervents, tignint ancje rivuart pes sieltis di destinazion des risorsis a disposizion;

c) cuâl che al è il stât di aplicazion dal insegnament de lenghe furlane tes istituzions scolastichis e cuâi percors formatîfs di nivel universitari che a son stâts inviâts pe abilitazion al insegnament dal furlan.

3.

Ogni cinc agns, prime de presentazion ae Comission consiliâr competente dal Plan gjenerâl di politiche linguistiche pal cuincueni dopo, la Zonte e presente al Consei un rapuart sui risultâts vûts in tiermins di slargjament dal ûs de lenghe furlane. In particolâr il rapuart al à dentri rispuestis documentadis a chestis domandis:

a) in ce misure che i intervents fats a àn judât a rinfuarcî l'esercizi dal dirit al ûs de lenghe furlane tal teritori di riferiment rispiet ae situazion prime de jentrade in vore di cheste leç, massime tai rapuarts cu la aministrazion regjonâl, cu lis aministrazions locâls e cui concessionaris di servizis publics;

b) cualis che a son stadis lis eventuâls variazions ae delimitazion dal teritori di insediament dal grup linguistic furlan;

c) cuale che e je stade la rispueste dade des fameis te sielte dal insegnament de lenghe furlane e cuale che e je la lôr opinion sui efiets su lis competencis dai arlêfs e dai students, in rivuart particolâr aes iniziativis di ûs veicolâr de lenghe furlane pal aprendiment di altris dissiplinis.

4.

Lis relazions e i rapuarts a son dâts publics, dutun cui documents dal Consei che a 'ndi sierin l'esam. I risultâts de valutazion dal Consei a fasin di riferiment pes sieltis dal Plan gjenerâl di politiche linguistiche pal cuincueni dopo.

Art. 30

(Conference di verifiche e di propueste)

1.

Il President dal Consei regjonâl al clame, almancul une volte ogni cinc agns, e in dut câs no in plui sîs mês prime de scjadince de legjislature, une Conference di verifiche e di propueste par verificâ la metude in vore di cheste leç.

2.

A son invidâts ae Conference i components dal Consei e de Zonte regjonâl, i rapresentants dai uficis e dai servizis regjonâi interessâts ae metude in vore di cheste leç, i components dai orghins istituzionâi de ARLeF, e ancje i rapresentants dai ents locâi, de Universitât dal Friûl, des istituzions scolastichis, des realtâts associativis ricognossudis su la fonde dal articul 24 e dai mieçs di

comunicazion.

3.

L'Ufici di Presidence dal Consei regjonâl, slargjât ai cjâfs grup, dopo sintût il President de ARLeF, al fisse l'ordin dal dì e lis modalitâts di davuelziment de Conference.

 

Cjapitul VIII

Normis transitoriis e finâls

 

Art. 31

(Normis transitoriis)

1.

Fintremai ae date di jentrade in vore dal regolament previodût dal articul 17, come 5, lis istituzions scolastichis a van indevant a zovâsi pal insegnament de lenghe furlane dal personâl docent individuât daûr des modalitâts dal come 1 di chel istès articul.

2.

Pal articul 24, in prime aplicazion di cheste leç,a son confermâts i sogjets cumò ricognossûts daûr dal articul 8 de leç regjonâl 15/1996 e si apliche il decret dal President de Regjon n. 0178/Pres. dai 13 di Jugn dal 2006 (Regolament pes modalitâts pe concession des sovenzions e pai criteris pe ripartizion des risorsis destinadis in pro dai ents ricognossûts daûr dal articul 8, come 2, letare b) e

come 2 bis de leç regjonâl n. 15 dai 22 di Març dal 1996, cun normis pe tutele e pe promozion de lenghe e de culture furlanis).

Art. 32

(Normis finâls)

1.

Cun decret dal President de Regjon, daûr de deliberazion conforme de Zonte regjonâl, a puedin jessi fatis variazions ae delimitazion teritoriâl fate daûr dal articul 5 de leç regjonâl 15/1996 dentri di doi agns de date di jentrade in vore di cheste leç.

2.

Lis variazions a son disponudis daûr di deliberazions conformis dai Conseis comunâi dai teritoris interessâts, motivadis a palês cun riferiment ae valutazion de consistence de cuote di popolazion che e fevele la lenghe furlane e de incidence dal ûs de lenghe stesse tal teritori comunâl, fatis buinis cun maiorance di plui dai doi tierçs dai components. La deliberazion consiliâr e je metude tant che fonde dal proviodiment di variazion, gjavant i câs che, tal tiermin segnât tal come 1, a rivin segnalazions contrariis di bande di almancul i 15 par cent dai citadins scrits tes listis eletorâls e residents tai comuns stes.

Art. 33

(Abrogazions)

1.

A son abrogadis in particolâr chestis disposizions de leç regionâl 15/1996:

a) articul 4;

b) articul 11;

c) come 2 dal articul 11 bis;

d) articul 12;

e) come 3 dal articul 13;

f) comis 1, 2 e 3 dal articul 14;

g) articul 27;

h) articul 28.

2.

A son abrogâts i comis 78, 79 e 80 dal articul 6 de leç regjonâl n. 4 dai 15 di Fevrâr dal 1999 (Leç finanziarie 1999).

3.

E je abrogade la letare c), dal come 66, dal articul 6 de leç n. 4 dai 26 di Fevrâr dal 2001 (Leç finanziarie 2001).

4.

A son abrogâts i comis 2 e 11 dal articul 124 de leç regjonâl n. 13 dai 9 di Novembar dal 1998 (di modificazion de leç regjonâl 15/1996).

5.

Al è abrogât l'articul 3 de leç regjonâl n. 22 dai12 di Lui dal 1999 (di modificazion dal articul 6 de leç regjonâl 4/1999).

Art. 34

(Normis finanziariis)

1.

Pal finanziament des azions e dai intervents previodûts di cheste leç si viôt daûr des disposizions puartadis de legjislazion regjonâl in vore tes materiis segnadis de leç stesse, cun cjamis a caric di chestis unitâts revisionâls di fonde dal stât di prevision de spese dal belanç pai agns 2007-2009 e dal belanç pal an 2007 cun riferiment ai cjapitui dal document tecnic zontât ai belançs stes in bande di ognidune, segnâts: UPB 8.4.300.1.310 - cjapitui 417, 5536 e 5543; UPB 8.4.300.1.1901 - cjapitul 5567 e cjapitul 5572 su fonts statâi.

2.

Simpri restant bon ce che al è segnât tal come 1, cun normis di leç finanziarie anuâl a puedin jessi disponûts intervents specifics par meti in vore azions previodudis di cheste leç e autorizâts che ur corispuindin stanziaments specifics, ancje di fâ valê su lis assegnazions anuâls di fonts statâi trasferîts ae Regjon daûr de leç 482/1999 e dal decret legjislatîf 223/2002.