CIRF - Centro Interdipartimentale di Ricerca sulla Cultura e la Lingua del Friuli

Centro Interdipartimentale per lo sviluppo della lingua e della cultura del Friuli “Josef Marchet

Cors di furlan par students UNIUD e zovins fin ai 29 agns

Cerimonie di scree: ai 30 di Otubar dal 2017

Slargjâ la ufierte formative pai students, vierzint di plui la proprie puarte di cjase. Cheste la propueste dal Centri Interdipartimentâl pal svilup de lenghe e de culture dal Friûl (CIRF), che al à pensât di inmaneâ doi cors di lenghe e culture furlane pai iscrits ae Universitât dal Friûl e pai zovins fin ai 29 agns, di mût di fâur cognossi miôr la ricjece de nestre tiere, sedi a nivel linguistic, sedi par chel che al inten la storie, lis tradizions e il teritori. Lis lezions, che si davuelzaran dulinvie dal mês di Novembar, a consistin in 10 incuintris, par un totâl di 20 oris, e a tacaran ai 30 di Otubar, cuntune cerimonie di scree che si fasarà a lis 17.30 te Sale dal Consei di Palaç Garzolini-di Toppo Wassermann. Un cors si tignarà ai Riçs (Aule 1), di lunis e di miercus, cun orari 17.00-19.00; chel altri si davuelzarà tal Palaç Antonini (Aule 9), il lunis e la joibe, cun orari 14.00-16.00. La ativitât e je metude in pîts cul patrocini de Agjenzie Regjonâl pe Lenghe Furlane (ARLeF) e de Societât Filologjiche Furlane e cu la poie de Fondazion Friuli. Pai partecipants che lu volaran, dongje des lezions frontâls, a son in program ancje visitis vuidadis a realtâts locâls, tant che lis sedis de ARLeF e de Filologjiche, i studis di Radio Onde Furlane e i archivis de biblioteche umanistiche dal Ateneu. Ae fin des lezions e je previodude une prove par stazâ lis competencis. A ducj i iscrits ur vignarà dât un atestât di partecipazion.

Il modul di iscrizion si pues scjamâlu dal sît dal CIRF: http://cirf.uniud.it/. Par informazions e pes iscrizions si pues clamâ il CIRF al numar 0432 556480 o pûr mandâ un messaç di pueste eletroniche a sportel.furlan@uniud.it o a cirf@uniud.it